Vulgata Clementina
Psalmi 66
1In finem, in hymnis. Psalmus cantici David.
2Deus misereatur nostri, et benedicat nobis; illuminet vultum suum super nos, et misereatur nostri:
3ut cognoscamus in terra viam tuam, in omnibus gentibus salutare tuum.
4Confiteantur tibi populi, Deus: confiteantur tibi populi omnes.
5Laetentur et exsultent gentes, quoniam iudicas populos in aequitate, et gentes in terra dirigis.
6Confiteantur tibi populi, Deus: confiteantur tibi populi omnes.
7Terra dedit fructum suum: benedicat nos Deus, Deus noster!
8Benedicat nos Deus, et metuant eum omnes fines terrae.
