Psalmi 23

¹Prima sabbati. Psalmus David. Domini est terra, et plenitudo eius; orbis terrarum, et universi qui habitant in eo.

²Quia ipse super maria fundavit eum, et super flumina praeparavit eum.

³Quis ascendet in montem Domini? aut quis stabit in loco sancto eius?

⁴Innocens manibus et mundo corde, qui non accepit in vano animam suam, nec iuravit in dolo proximo suo:

⁵hic accipiet benedictionem a Domino, et misericordiam a Deo salutari suo.

⁶Haec est generatio quaerentium eum, quaerentium faciem Dei Iacob.

⁷Attollite portas, principes, vestras, et elevamini, portae aeternales, et introibit rex gloriae.

⁸Quis est iste rex gloriae? Dominus fortis et potens, Dominus potens in praelio.

⁹Attollite portas, principes, vestras, et elevamini, portae aeternales, et introibit rex gloriae.

¹⁰Quis est iste rex gloriae? Dominus virtutum ipse est rex gloriae.