Psalmi 74

¹In finem, ne corrumpas. Psalmus cantici Asaph.

²Confitebimur tibi, Deus, confitebimur, et invocabimus nomen tuum; narrabimus mirabilia tua.

³Cum accepero tempus, ego iustitias iudicabo.

⁴Liquefacta est terra et omnes qui habitant in ea: ego confirmavi columnas eius.

⁵Dixi iniquis: Nolite inique agere: et delinquentibus: Nolite exaltare cornu:

⁶nolite extollere in altum cornu vestrum; nolite loqui adversus Deum iniquitatem.

⁷Quia neque ab oriente, neque ab occidente, neque a desertis montibus:

⁸quoniam Deus iudex est. Hunc humiliat, et hunc exaltat:

⁹quia calix in manu Domini vini meri, plenus misto. Et inclinavit ex hoc in hoc; verumtamen faex eius non est exinanita: bibent omnes peccatores terrae.

¹⁰Ego autem annuntiabo in saeculum; cantabo Deo Iacob:

¹¹et omnia cornua peccatorum confringam, et exaltabuntur cornua iusti.