Psalmi 81

¹Psalmus Asaph. Deus stetit in synagoga deorum; in medio autem deos diiudicat.

²Usquequo iudicatis iniquitatem, et facies peccatorum sumitis?

³Iudicate egeno et pupillo; humilem et pauperem iustificate.

⁴Eripite pauperem, et egenum de manu peccatoris liberate.

⁵Nescierunt, neque intellexerunt; in tenebris ambulant: movebuntur omnia fundamenta terrae.

⁶Ego dixi: Dii estis, et filii Excelsi omnes.

⁷Vos autem sicut homines moriemini, et sicut unus de principibus cadetis.

⁸Surge, Deus, iudica terram, quoniam tu haereditabis in omnibus gentibus.