Psalmi 46

¹In finem, pro filiis Core. Psalmus.

²Omnes gentes, plaudite manibus; iubilate Deo in voce exsultationis:

³quoniam Dominus excelsus, terribilis, rex magnus super omnem terram.

⁴Subiecit populos nobis, et gentes sub pedibus nostris.

⁵Elegit nobis haereditatem suam; speciem Iacob quam dilexit.

⁶Ascendit Deus in iubilo, et Dominus in voce tubae.

⁷Psallite Deo nostro, psallite; psallite regi nostro, psallite:

⁸quoniam rex omnis terrae Deus, psallite sapienter.

⁹Regnabit Deus super gentes; Deus sedet super sedem sanctam suam.

¹⁰Principes populorum congregati sunt cum Deo Abraham, quoniam dii fortes terrae vehementer elevati sunt.