Psalmi 147

¹Alleluia. Lauda, Ierusalem, Dominum; lauda Deum tuum, Sion.

²Quoniam confortavit seras portarum tuarum; benedixit filiis tuis in te.

³Qui posuit fines tuos pacem, et adipe frumenti satiat te.

⁴Qui emittit eloquium suum terrae: velociter currit sermo eius.

⁵Qui dat nivem sicut lanam; nebulam sicut cinerem spargit.

⁶Mittit crystallum suam sicut buccellas: ante faciem frigoris eius quis sustinebit?

⁷Emittet verbum suum, et liquefaciet ea; flabit spiritus eius, et fluent aquae.

⁸Qui annuntiat verbum suum Iacob, iustitias et iudicia sua Israël.

⁹Non fecit taliter omni nationi, et iudicia sua non manifestavit eis. Alleluia.