Vulgata Clementina
Psalmi 22
1Psalmus David. Dominus regit me, et nihil mihi deerit:
2in loco pascuae, ibi me collocavit. Super aquam refectionis educavit me;
3animam meam convertit. Deduxit me super semitas iustitiae propter nomen suum.
4Nam etsi ambulavero in medio umbrae mortis, non timebo mala, quoniam tu mecum es. Virga tua, et baculus tuus, ipsa me consolata sunt.
5Parasti in conspectu meo mensam adversus eos qui tribulant me; impinguasti in oleo caput meum: et calix meus inebrians, quam praeclarus est!
6Et misericordia tua subsequetur me omnibus diebus vitae meae; et ut inhabitem in domo Domini in longitudinem dierum.
