Psalmi 15

¹Tituli inscriptio, ipsi David. Conserva me, Domine, quoniam speravi in te.

²Dixi Domino: Deus meus es tu, quoniam bonorum meorum non eges.

³Sanctis qui sunt in terra eius, mirificavit omnes voluntates meas in eis.

⁴Multiplicatae sunt infirmitates eorum: postea acceleraverunt. Non congregabo conventicula eorum de sanguinibus, nec memor ero nominum eorum per labia mea.

⁵Dominus pars haereditatis meae, et calicis mei: tu es qui restitues haereditatem meam mihi.

⁶Funes ceciderunt mihi in praeclaris; etenim haereditas mea praeclara est mihi.

⁷Benedicam Dominum qui tribuit mihi intellectum; insuper et usque ad noctem increpuerunt me renes mei.

⁸Providebam Dominum in conspectu meo semper: quoniam a dextris est mihi, ne commovear.

⁹Propter hoc laetatum est cor meum, et exsultavit lingua mea; insuper et caro mea requiescet in spe.

¹⁰Quoniam non derelinques animam meam in inferno, nec dabis sanctum tuum videre corruptionem. Notas mihi fecisti vias vitae; adimplebis me laetitia cum vultu tuo: delectationes in dextera tua usque in finem.