Psalmi 32

¹Psalmus David. Exsultate, iusti, in Domino; rectos decet collaudatio.

²Confitemini Domino in cithara; in psalterio decem chordarum psallite illi.

³Cantate ei canticum novum; bene psallite ei in vociferatione.

⁴Quia rectum est verbum Domini, et omnia opera eius in fide.

⁵Diligit misericordiam et iudicium; misericordia Domini plena est terra.

⁶Verbo Domini caeli firmati sunt, et spiritu oris eius omnis virtus eorum.

⁷Congregans sicut in utre aquas maris; ponens in thesauris abyssos.

⁸Timeat Dominum omnis terra; ab eo autem commoveantur omnes inhabitantes orbem.

⁹Quoniam ipse dixit, et facta sunt; ipse mandavit et creata sunt.

¹⁰Dominus dissipat consilia gentium; reprobat autem cogitationes populorum, et reprobat consilia principum.

¹¹Consilium autem Domini in aeternum manet; cogitationes cordis eius in generatione et generationem.

¹²Beata gens cuius est Dominus Deus eius; populus quem elegit in haereditatem sibi.

¹³De caelo respexit Dominus; vidit omnes filios hominum.

¹⁴De praeparato habitaculo suo respexit super omnes qui habitant terram:

¹⁵qui finxit sigillatim corda eorum; qui intelligit omnia opera eorum.

¹⁶Non salvatur rex per multam virtutem, et gigas non salvabitur in multitudine virtutis suae.

¹⁷Fallax equus ad salutem; in abundantia autem virtutis suae non salvabitur.

¹⁸Ecce oculi Domini super metuentes eum, et in eis qui sperant super misericordia eius:

¹⁹ut eruat a morte animas eorum, et alat eos in fame.

²⁰Anima nostra sustinet Dominum, quoniam adiutor et protector noster est.

²¹Quia in eo laetabitur cor nostrum, et in nomine sancto eius speravimus.

²²Fiat misericordia tua, Domine, super nos, quemadmodum speravimus in te.