Proverbia 29

¹Viro qui corripientem dura cervice contemnit, repentinus ei superveniet interitus, et eum sanitas non sequetur.

²In multiplicatione iustorum laetabitur vulgus; cum impii sumpserint principatum, gemet populus.

³Vir qui amat sapientiam laetificat patrem suum; qui autem nutrit scorta perdet substantiam.

⁴Rex iustus erigit terram; vir avarus destruet eam.

⁵Homo qui blandis fictisque sermonibus loquitur amico suo rete expandit gressibus eius.

⁶Peccantem virum iniquum involvet laqueus, et iustus laudabit atque gaudebit.

⁷Novit iustus causam pauperum; impius ignorat scientiam.

⁸Homines pestilentes dissipant civitatem; sapientes vero avertunt furorem.

⁹Vir sapiens si cum stulto contenderit, sive irascatur, sive rideat, non inveniet requiem.

¹⁰Viri sanguinum oderunt simplicem; iusti autem quaerunt animam eius.

¹¹Totum spiritum suum profert stultus; sapiens differt, et reservat in posterum.

¹²Princeps qui libenter audit verba mendacii, omnes ministros habet impios.

¹³Pauper et creditor obviaverunt sibi: utriusque illuminator est Dominus.

¹⁴Rex qui iudicat in veritate pauperes, thronus eius in aeternum firmabitur.

¹⁵Virga atque correptio tribuit sapientiam; puer autem qui dimittitur voluntati suae confundit matrem suam.

¹⁶In multiplicatione impiorum multiplicabuntur scelera, et iusti ruinas eorum videbunt.

¹⁷Erudi filium tuum, et refrigerabit te, et dabit delicias animae tuae.

¹⁸Cum prophetia defecerit, dissipabitur populus; qui vero custodit legem beatus est.

¹⁹Servus verbis non potest erudiri, quia quod dicis intelligit, et respondere contemnit.

²⁰Vidisti hominem velocem ad loquendum? stultitia magis speranda est quam illius correptio.

²¹Qui delicate a pueritia nutrit servum suum postea sentiet eum contumacem.

²²Vir iracundus provocat rixas, et qui ad indignandum facilis est erit ad peccandum proclivior.

²³Superbum sequitur humilitas, et humilem spiritu suscipiet gloria.

²⁴Qui cum fure participat odit animam suam; adiurantem audit, et non indicat.

²⁵Qui timet hominem cito corruet; qui sperat in Domino sublevabitur.

²⁶Multi requirunt faciem principis, et iudicium a Domino egreditur singulorum.

²⁷Abominantur iusti virum impium, et abominantur impii eos qui in recta sunt via. Verbum custodiens filius extra perditionem erit.