Dia 23 decembris

Ecce ego mitto angelum meum, et praeparabit viam ante faciem meam: et statim veniet ad templum suum Dominator quem vos quaeritis, et angelus testamenti quem vos vultis. Ecce venit, dicit Dominus exercituum. ²Et quis poterit cogitare diem adventus eius, et quis stabit ad videndum eum? ipse enim quasi ignis conflans, et quasi herba fullonum: ³et sedebit conflans, et emundans argentum: et purgabit filios Levi, et colabit eos quasi aurum et quasi argentum, et erunt Domino offerentes sacrificia in iustitia. ⁴Et placebit Domino sacrificium Iuda et Ierusalem, sicut dies saeculi, et sicut anni antiqui. ²³Ecce ego mittam vobis Eliam prophetam, antequam veniat dies Domini magnus et horribilis. ²⁴Et convertet cor patrum ad filios, et cor filiorum ad patres eorum: ne forte veniam, et percutiam terram anathemate.

⁴Confundantur omnes iniqua agentes supervacue. Vias tuas, Domine, demonstra mihi, et semitas tuas edoce me. ⁵Dirige me in veritate tua, et doce me, quia tu es Deus salvator meus, et te sustinui tota die. ⁸Dulcis et rectus Dominus; propter hoc legem dabit delinquentibus in via. ⁹Diriget mansuetos in iudicio; docebit mites vias suas. ¹⁰Universae viae Domini, misericordia et veritas, requirentibus testamentum eius et testimonia eius. ¹⁴Firmamentum est Dominus timentibus eum; et testamentum ipsius ut manifestetur illis.

℟ Levate capita vestra, quoniam appropinquat redemptio vestra.

Elisabeth autem impletum est tempus pariendi, et peperit filium. ⁵⁸Et audierunt vicini et cognati eius quia magnificavit Dominus misericordiam suam cum illa, et congratulabantur ei. ⁵⁹Et factum est in die octavo, venerunt circumcidere puerum, et vocabant eum nomine patris sui Zachariam. ⁶⁰Et respondens mater eius, dixit: Nequaquam, sed vocabitur Ioannes. ⁶¹Et dixerunt ad illam: Quia nemo est in cognatione tua, qui vocetur hoc nomine. ⁶²Innuebant autem patri eius, quem vellet vocari eum. ⁶³Et postulans pugillarem scripsit, dicens: Ioannes est nomen eius. Et mirati sunt universi. ⁶⁴Apertum est autem illico os eius, et lingua eius, et loquebatur benedicens Deum. ⁶⁵Et factus est timor super omnes vicinos eorum: et super omnia montana Iudaeae divulgabantur omnia verba haec: ⁶⁶et posuerunt omnes qui audierant in corde suo, dicentes: Quis, putas, puer iste erit? etenim manus Domini erat cum illo.