In Nativitate Domini

Populus qui ambulabat in tenebris, vidit lucem magnam; habitantibus in regione umbrae mortis, lux orta est eis. ²Multiplicasti gentem, et non magnificasti laetitiam. Laetabuntur coram te, sicut qui laetantur in messe; sicut exsultant victores capta praeda, quando dividunt spolia. ³Iugum enim oneris eius, et virgam humeri eius, et sceptrum exactoris eius superasti, sicut in die Madian. ⁵Parvulus enim natus est nobis, et filius datus est nobis, et factus est principatus super humerum eius: et vocabitur nomen eius, Admirabilis, Consiliarius, Deus, Fortis, Pater futuri saeculi, Princeps pacis. ⁶Multiplicabitur eius imperium, et pacis non erit finis; super solium David, et super regnum eius sedebit, ut confirmet illud et corroboret in iudicio et iustitia, amodo et usque in sempiternum: zelus Domini exercituum faciet hoc.

¹Canticum ipsi David, quando domus aedificabatur post captivitatem. Cantate Domino canticum novum; cantate Domino omnis terra. ²Cantate Domino, et benedicite nomini eius; annuntiate de die in diem salutare eius. ³Annuntiate inter gentes gloriam eius; in omnibus populis mirabilia eius. ¹¹Laetentur caeli, et exsultet terra; commoveatur mare et plenitudo eius; ¹²gaudebunt campi, et omnia quae in eis sunt. Tunc exsultabunt omnia ligna silvarum ¹³a facie Domini, quia venit, quoniam venit iudicare terram. Iudicabit orbem terrae in aequitate, et populos in veritate sua.

℟ Natus est vobis hodie Salvator, qui est Christus Dominus.

Apparuit enim gratia Dei Salvatoris nostri omnibus hominibus, ¹²erudiens nos, ut abnegantes impietatem, et saecularia desideria, sobrie, et iuste, et pie vivamus in hoc saeculo, ¹³exspectantes beatam spem, et adventum gloriae magni Dei, et Salvatoris nostri Iesu Christi: ¹⁴qui dedit semetipsum pro nobis, ut nos redimeret ab omni iniquitate, et mundaret sibi populum acceptabilem, sectatorem bonorum operum.

Factum est autem in diebus illis, exiit edictum a Caesare Augusto ut describeretur universus orbis. ²Haec descriptio prima facta est a praeside Syriae Cyrino: ³et ibant omnes ut profiterentur singuli in suam civitatem. ⁴Ascendit autem et Ioseph a Galilaea de civitate Nazareth in Iudaeam, in civitatem David, quae vocatur Bethlehem: eo quod esset de domo et familia David, ⁵ut profiteretur cum Maria desponsata sibi uxore praegnante. ⁶Factum est autem, cum essent ibi, impleti sunt dies ut pareret. ⁷Et peperit filium suum primogenitum, et pannis eum involvit, et reclinavit eum in praesepio: quia non erat eis locus in diversorio. ⁸Et pastores erant in regione eadem vigilantes, et custodientes vigilias noctis super gregem suum. ⁹Et ecce angelus Domini stetit iuxta illos, et claritas Dei circumfulsit illos, et timuerunt timore magno. ¹⁰Et dixit illis angelus: Nolite timere: ecce enim evangelizo vobis gaudium magnum, quod erit omni populo: ¹¹quia natus est vobis hodie Salvator, qui est Christus Dominus, in civitate David. ¹²Et hoc vobis signum: invenietis infantem pannis involutum, et positum in praesepio. ¹³Et subito facta est cum angelo multitudo militiae caelestis laudantium Deum, et dicentium: ¹⁴Gloria in altissimis Deo, et in terra pax hominibus bonae voluntatis.