S. Stephani, protomartyris

Stephanus autem plenus gratia et fortitudine, faciebat prodigia et signa magna in populo. ⁹Surrexerunt autem quidam de synagoga quae appellatur Libertinorum, et Cyrenensium, et Alexandrinorum, et eorum qui erant a Cilicia, et Asia, disputantes cum Stephano: ¹⁰et non poterant resistere sapientiae, et Spiritui qui loquebatur. ⁵⁴Audientes autem haec, dissecabantur cordibus suis, et stridebant dentibus in eum. ⁵⁵Cum autem esset plenus Spiritu Sancto, intendens in caelum, vidit gloriam Dei, et Iesum stantem a dextris Dei. Et ait: Ecce video caelos apertos, et Filium hominis stantem a dextris Dei. ⁵⁷Exclamantes autem voce magna continuerunt aures suas, et impetum fecerunt unanimiter in eum. ⁵⁸Et eiicientes eum extra civitatem, lapidabant: et testes deposuerunt vestimenta sua secus pedes adolescentis qui vocabatur Saulus. ⁵⁹Et lapidabant Stephanum invocantem, et dicentem: Domine Iesu, suscipe spiritum meum. ⁶⁰Positis autem genibus, clamavit voce magna, dicens: Domine, ne statuas illis hoc peccatum. Et cum hoc dixisset, obdormivit in Domino. Saulus autem erat consentiens neci eius.

³Inclina ad me aurem tuam; accelera ut eruas me. Esto mihi in Deum protectorem, et in domum refugii, ut salvum me facias: ⁴quoniam fortitudo mea et refugium meum es tu; et propter nomen tuum deduces me et enutries me. ⁶In manus tuas commendo spiritum meum; redemisti me, Domine Deus veritatis. ⁷Odisti observantes vanitates supervacue; ego autem in Domino speravi. ⁸Exsultabo, et laetabor in misericordia tua, quoniam respexisti humilitatem meam; salvasti de necessitatibus animam meam. ¹⁷Illustra faciem tuam super servum tuum; salvum me fac in misericordia tua. ²¹Abscondes eos in abscondito faciei tuae a conturbatione hominum; proteges eos in tabernaculo tuo, a contradictione linguarum.

℟ In manus tuas commendo spiritum meum.

Cavete autem ab hominibus. Tradent enim vos in conciliis, et in synagogis suis flagellabunt vos: ¹⁸et ad praesides, et ad reges ducemini propter me in testimonium illis, et gentibus. ¹⁹Cum autem tradent vos, nolite cogitare quomodo, aut quid loquamini: dabitur enim vobis in illa hora, quid loquamini: ²⁰non enim vos estis qui loquimini, sed Spiritus Patris vestri, qui loquitur in vobis. ²¹Tradet autem frater fratrem in mortem, et pater filium: et insurgent filii in parentes, et morte eos afficient: ²²et eritis odio omnibus propter nomen meum: qui autem perseveraverit usque in finem, hic salvus erit.