Sanctae Familiae Iesu, Mariae et Ioseph

Iudicium patris audite, filii, et sic facite, ut salvi sitis. ³Deus enim honoravit patrem in filiis: et iudicium matris exquirens, firmavit in filios. ⁴Qui diligit Deum exorabit pro peccatis, et continebit se ab illis, et in oratione dierum exaudietur. ⁵Et sicut qui thesaurizat, ita et qui honorificat matrem suam. ⁶Qui honorat patrem suum iucundabitur in filiis, et in die orationis suae exaudietur. ¹²Ne glorieris in contumelia patris tui: non enim est tibi gloria eius confusio. ¹³Gloria enim hominis ex honore patris sui, et dedecus filii pater sine honore. ¹⁴Fili, suscipe senectam patris tui, et non contristes eum in vita illius:

¹Canticum graduum. Beati omnes qui timent Dominum, qui ambulant in viis eius. ²Labores manuum tuarum quia manducabis: beatus es, et bene tibi erit. ³Uxor tua sicut vitis abundans in lateribus domus tuae; filii tui sicut novellae olivarum in circuitu mensae tuae. ⁴Ecce sic benedicetur homo qui timet Dominum. ⁵Benedicat tibi Dominus ex Sion, et videas bona Ierusalem omnibus diebus vitae tuae.

℟ Beati omnes qui timent Dominum, qui ambulant in viis eius.

Induite vos ergo, sicut electi Dei, sancti, et dilecti, viscera misericordiae, benignitatem, humilitatem, modestiam, patientiam: ¹³supportantes invicem, et donantes vobismetipsis si quis adversus aliquem habet querelam: sicut et Dominus donavit vobis, ita et vos. ¹⁴Super omnia autem haec, caritatem habete, quod est vinculum perfectionis: ¹⁵et pax Christi exsultet in cordibus vestris, in qua et vocati estis in uno corpore: et grati estote. ¹⁶Verbum Christi habitet in vobis abundanter, in omni sapientia, docentes, et commonentes vosmetipsos, psalmis, hymnis, et canticis spiritualibus, in gratia cantantes in cordibus vestris Deo. ¹⁷Omne, quodcumque facitis in verbo aut in opere, omnia in nomine Domini Iesu Christi, gratias agentes Deo et Patri per ipsum. ¹⁸Mulieres, subditae estote viris, sicut oportet, in Domino. ¹⁹Viri, diligite uxores vestras, et nolite amari esse ad illas. ²⁰Filii, obedite parentibus per omnia: hoc enim placitum est in Domino. ²¹Patres, nolite ad indignationem provocare filios vestros, ut non pusillo animo fiant.

Et postquam impleti sunt dies purgationis eius secundum legem Moysi, tulerunt illum in Ierusalem, ut sisterent eum Domino, ²³sicut scriptum est in lege Domini: Quia omne masculinum adaperiens vulvam, sanctum Domino vocabitur: ²⁴et ut darent hostiam secundum quod dictum est in lege Domini, par turturum, aut duos pullos columbarum. ²⁵Et ecce homo erat in Ierusalem, cui nomen Simeon, et homo iste iustus, et timoratus, exspectans consolationem Israël: et Spiritus Sanctus erat in eo. ²⁶Et responsum acceperat a Spiritu Sancto, non visurum se mortem, nisi prius videret Christum Domini. ²⁷Et venit in spiritu in templum. Et cum inducerent puerum Iesum parentes eius, ut facerent secundum consuetudinem legis pro eo, ²⁸et ipse accepit eum in ulnas suas: et benedixit Deum, et dixit: ²⁹Nunc dimittis servum tuum Domine, secundum verbum tuum in pace: ³⁰quia viderunt oculi mei salutare tuum, ³¹quod parasti ante faciem omnium populorum: ³²lumen ad revelationem gentium, et gloriam plebis tuae Israël. ³³Et erat pater eius et mater mirantes super his quae dicebantur de illo. ³⁴Et benedixit illis Simeon, et dixit ad Mariam matrem eius: Ecce positus est hic in ruinam et in resurrectionem multorum in Israël, et in signum cui contradicetur: ³⁵et tuam ipsius animam pertransibit gladius ut revelentur ex multis cordibus cogitationes. ³⁶Et erat Anna prophetissa, filia Phanuel, de tribu Aser: haec processerat in diebus multis, et vixerat cum viro suo annis septem a virginitate sua. ³⁷Et haec vidua usque ad annos octoginta quatuor: quae non discedebat de templo, ieiuniis et obsecrationibus serviens nocte ac die. ³⁸Et haec, ipsa hora superveniens, confitebatur Domino: et loquebatur de illo omnibus, qui exspectabant redemptionem Israël. ³⁹Et ut perfecerunt omnia secundum legem Domini, reversi sunt in Galilaeam in civitatem suam Nazareth. ⁴⁰Puer autem crescebat, et confortabatur plenus sapientia: et gratia Dei erat in illo.