I Paralipomenon 5

¹Filii quoque Ruben primogeniti Israël. (Ipse quippe fuit primogenitus eius: sed cum violasset thorum patris sui, data sunt primogenita eius filiis Ioseph filii Israël, et non est ille reputatus in primogenitum. ²Porro Iudas, qui erat fortissimus inter fratres suos, de stirpe eius principes germinati sunt: primogenita autem reputata sunt Ioseph.) ³Filii ergo Ruben primogeniti Israël: Enoch, et Phallu, Esron, et Carmi.

⁴Filii Ioël: Samia filius eius, Gog filius eius, Semei filius eius, ⁵Micha filius eius, Reia filius eius, Baal filius eius, ⁶Beera filius eius, quem captivum duxit Thelgathphalnasar rex Assyriorum, et fuit princeps in tribu Ruben. ⁷Fratres autem eius, et universa cognatio eius, quando numerabantur per familias suas, habuerunt principes Iehiel, et Zachariam. ⁸Porro Bala filius Azaz filii Samma filii Ioël, ipse habitavit in Aroër usque ad Nebo, et Beelmeon. ⁹Contra orientalem quoque plagam habitavit usque ad introitum eremi, et flumen Euphraten. Multum quippe iumentorum numerum possidebant in terra Galaad. ¹⁰In diebus autem Saul praeliati sunt contra Agareos, et interfecerunt illos, habitaveruntque pro eis in tabernaculis eorum, in omni plaga quae respicit ad orientem Galaad.

¹¹Filii vero Gad e regione eorum habitaverunt in terra Basan usque Selcha: ¹²Ioël in capite, et Saphan secundus: Ianai autem et Saphat in Basan. ¹³Fratres vero eorum secundum domos cognationum suarum, Michaël, et Mosollam, et Sebe, et Iorai, et Iachan, et Zie, et Heber, septem. ¹⁴Hi filii Abihail, filii Huri, filii Iara, filii Galaad, filii Michaël, filii Iesesi, filii Ieddo, filii Buz. ¹⁵Fratres quoque, filii Abdiel filii Guni, princeps domus in familiis suis. ¹⁶Et habitaverunt in Galaad, et in Basan, et in viculis eius, et in cunctis suburbanis Saron, usque ad terminos. ¹⁷Omnes hi numerati sunt in diebus Ioathan regis Iuda, et in diebus Ieroboam regis Israël.

¹⁸Filii Ruben, et Gad, et dimidiae tribus Manasse, viri bellatores, scuta portantes et gladios, et tendentes arcum, eruditique ad praelia, quadraginta quatuor millia et septingenti sexaginta, procedentes ad pugnam. ¹⁹Dimicaverunt contra Agareos: Ituraei vero, et Naphis, et Nodab ²⁰praebuerunt eis auxilium. Traditique sunt in manus eorum Agarei, et universi qui fuerant cum eis, quia Deum invocaverunt cum praeliarentur: et exaudivit eos, eo quod credidissent in eum. ²¹Ceperuntque omnia quae possederant, camelorum quinquaginta millia, et ovium ducenta quinquaginta millia, et asinos duo millia, et animas hominum centum millia. ²²Vulnerati autem multi corruerunt: fuit enim bellum Domini. Habitaveruntque pro eis usque ad transmigrationem.

²³Filii quoque dimidiae tribus Manasse possederunt terram a finibus Basan usque Baal, Hermon, et Sanir, et montem Hermon: ingens quippe numerus erat. ²⁴Et hi fuerunt principes domus cognationis eorum: Epher, et Iesi, et Eliel, et Ezriel, et Ieremia, et Odoia, et Iediel, viri fortissimi et potentes, et nominati duces in familiis suis.

²⁵Reliquerunt autem Deum patrum suorum, et fornicati sunt post deos populorum terrae, quos abstulit Deus coram eis. ²⁶Et suscitavit Deus Israël spiritum Phul regis Assyriorum, et spiritum Thelgathphalnasar regis Assur: et transtulit Ruben, et Gad, et dimidiam tribum Manasse, et adduxit eos in Lahela, et in Habor, et Ara, et fluvium Gozan, usque ad diem hanc.