I Paralipomenon 26

¹Divisiones autem ianitorum: de Coritis Meselemia, filius Core, de filiis Asaph. ²Filii Meselemiae: Zacharias primogenitus, Iadihel secundus, Zabadias tertius, Iathanaël quartus, ³Aelam quintus, Iohanan sextus, Elioënai septimus. ⁴Filii autem Obededom: Semeias primogenitus, Iozabad secundus, Ioaha tertius, Sachar quartus, Nathanaël quintus, ⁵Ammiel sextus, Issachar septimus, Phollathi octavus: quia benedixit illi Dominus. ⁶Semei autem filio eius nati sunt filii, praefecti familiarum suarum: erant enim viri fortissimi. ⁷Filii ergo Semeiae: Othni, et Raphaël, et Obed, Elzabad, fratres eius viri fortissimi: Eliu quoque et Samachias. ⁸Omnes hi, de filiis Obededom: ipsi, et filii et fratres eorum, fortissimi ad ministrandum, sexaginta duo de Obededom. ⁹Porro Meselemiae filii, et fratres eorum robustissimi, decem et octo.

¹⁰De Hosa autem, id est, de filiis Merari: Semri princeps (non enim habuerat primogenitum, et idcirco posuerat eum pater eius in principem), ¹¹Helcias secundus, Tabelias tertius, Zacharias quartus: omnes hi filii et fratres Hosa, tredecim.

¹²Hi divisi sunt in ianitores, ut semper principes custodiarum, sicut et fratres eorum ministrarent in domo Domini. ¹³Missae sunt ergo sortes ex aequo, et parvis et magnis, per familias suas in unamquamque portarum. ¹⁴Cecidit ergo sors orientalis, Selemiae. Porro Zachariae filio eius, viro prudentissimo et erudito, sortito obtigit plaga septentrionalis. ¹⁵Obededom vero et filiis eius ad austrum: in qua parte domus erat seniorum concilium. ¹⁶Sephim et Hosa ad occidentem, iuxta portam, quae ducit ad viam ascensionis: custodia contra custodiam. ¹⁷Ad orientem vero Levitae sex: et ad aquilonem, quatuor per diem: atque ad meridiem similiter in die quatuor: et ubi erat concilium bini et bini. ¹⁸In cellulis quoque ianitorum ad occidentem quatuor in via, binique per cellulas. ¹⁹Hae sunt divisiones ianitorum filiorum Core et Merari.

²⁰Porro Achias erat super thesauros domus Dei, et vasa sanctorum. ²¹Filii Ledan, filii Gersonni: de Ledan principes familiarum Ledan, et Gersonni, Iehieli. ²²Filii Iehieli: Zathan, et Ioël fratres eius super thesauros domus Domini. ²³Amramitis, et Isaaritis, et Hebronitis, et Ozihelitis.

²⁴Subaël autem filius Gersom filii Moysi, praepositus thesauris. ²⁵Fratres quoque eius Eliezer, cuius filius Rahabia, et huius filius Isaias, et huius filius Ioram, huius quoque filius Zechri, et huius filius Selemith. ²⁶Ipse Selemith, et fratres eius, super thesauros sanctorum quae sanctificavit David rex, et principes familiarum, et tribuni, et centuriones, et duces exercitus, ²⁷de bellis et manubiis praeliorum, quae consecraverant ad instaurationem et supellectilem templi Domini. ²⁸Haec autem universa sanctificavit Samuel videns, et Saul filius Cis, et Abner filius Ner, et Ioab filius Sarviae: omnes qui sanctificaverant ea per manum Selemith et fratrum eius.

²⁹Isaaritis vero praeerat Chonenias, et filii eius ad opera forinsecus super Israël ad docendum et iudicandum eos. ³⁰Porro de Hebronitis Hasabias, et fratres eius viri fortissimi, mille septingenti praeerant Israëli trans Iordanem contra occidentem, in cunctis operibus Domini, et in ministerium regis. ³¹Hebronitarum autem princeps fuit Ieria secundum familias et cognationes eorum. Quadragesimo anno regni David recensiti sunt, et inventi sunt viri fortissimi in Iazer Galaad, ³²fratresque eius robustioris aetatis, duo millia septingenti principes familiarum. Praeposuit autem eos David rex Rubenitis, et Gadditis, et dimidiae tribui Manasse, in omne ministerium Dei et regis.