I Paralipomenon 27

¹Filii autem Israël secundum numerum suum, principes familiarum, tribuni, et centuriones, et praefecti, qui ministrabant regi iuxta turmas suas, ingredientes et egredientes per singulos menses in anno, viginti quatuor millibus singuli praeerant.

²Primae turmae in primo mense Iesboam praeerat filius Zabdiel, et sub eo viginti quatuor millia; ³de filiis Phares, princeps cunctorum principum in exercitu mense primo. ⁴Secundi mensis habebat turmam Dudia Ahohites, et post se alter nomine Macelloth, qui regebat partem exercitus viginti quatuor millium. ⁵Dux quoque turmae tertiae in mense tertio erat Banaias filius Ioiadae sacerdos: et in divisione sua viginti quatuor millia. ⁶Ipse est Banaias fortissimus inter triginta, et super triginta: praeerat autem turmae ipsius Amizabad filius eius. ⁷Quartus, mense quarto, Asahel frater Ioab, et Zabadias filius eius post eum: et in turma eius viginti quatuor millia. ⁸Quintus, mense quinto, princeps Samaoth Iezerites: et in turma eius viginti quatuor millia. ⁹Sextus, mense sexto, Hira filius Acces Thecuites: et in turma eius viginti quatuor millia. ¹⁰Septimus, mense septimo, Helles Phallonites de filiis Ephraim: et in turma eius viginti quatuor millia. ¹¹Octavus, mense octavo, Sobochai Husathites de stirpe Zarahi: et in turma eius viginti quatuor millia. ¹²Nonus, mense nono, Abiezer Anathothites de filiis Iemini: et in turma eius viginti quatuor millia. ¹³Decimus, mense decimo, Marai, et ipse Netophathites de stirpe Zarai: et in turma eius viginti quatuor millia. ¹⁴Undecimus, mense undecimo, Banaias Pharathonites de filiis Ephraim: et in turma eius viginti quatuor millia. ¹⁵Duodecimus, mense duodecimo, Holdai Netophathites, de stirpe Gothoniel: et in turma eius viginti quatuor millia.

¹⁶Porro tribubus praeerant Israël, Rubenitis, dux Eliezer filius Zechri: Simeonitis, dux Saphatias filius Maacha: ¹⁷Levitis, Hasabias filius Camuel: Aaronitis, Sadoc: ¹⁸Iuda, Eliu frater David: Issachar, Amri filius Michaël. ¹⁹Zabulonitis, Iesmaias filius Abdiae: Nephthalitibus, Ierimoth filius Ozriel: ²⁰filiis Ephraim, Osee filius Ozaziu: dimidiae tribui Manasse, Ioël filius Phadaiae: ²¹et dimidiae tribui Manasse in Galaad, Iaddo filius Zachariae: Beniamin autem, Iasiel filius Abner: ²²Dan vero, Ezrihel filius Ieroham: hi principes filiorum Israël.

²³Noluit autem David numerare eos a viginti annis inferius: quia dixerat Dominus ut multiplicaret Israël quasi stellas caeli. ²⁴Ioab filius Sarviae coeperat numerare, nec complevit: quia super hoc ira irruerat in Israël, et idcirco numerus eorum qui fuerant recensiti, non est relatus in fastos regis David.

²⁵Super thesauros autem regis fuit Azmoth filius Adiel: his autem thesauris, qui erant in urbibus, et in vicis, et in turribus, praesidebat Ionathan filius Oziae. ²⁶Operi autem rustico, et agricolis qui exercebant terram, praeerat Ezri filius Chelub: ²⁷vinearumque cultoribus, Semeias Romathites: cellis autem vinariis, Zabdias Aphonites. ²⁸Nam super oliveta et ficeta quae erant in campestribus, Balanam Gederites: super apothecas autem olei, Ioas. ²⁹Porro armentis quae pascebantur in Saron, praepositus fuit Setrai Saronites: et super boves in vallibus, Saphat filius Adli: ³⁰super camelos vero, Ubil Ismahelites: et super asinos, Iadias Meronathites: ³¹super oves quoque, Iaziz Agareus: omnes hi, principes substantiae regis David.

³²Ionathan autem patruus David, consiliarius, vir prudens et litteratus: ipse et Iahiel filius Hachamoni erant cum filiis regis. ³³Achitophel etiam consiliarius regis, et Chusai Arachites amicus regis. ³⁴Post Achitophel fuit Ioiada filius Banaiae, et Abiathar. Princeps autem exercitus regis erat Ioab.