Feria tertia, hebdomada trigesima prima per annum

Hoc enim sentite in vobis, quod et in Christo Iesu: ⁶qui cum in forma Dei esset, non rapinam arbitratus est esse se aequalem Deo: ⁷sed semetipsum exinanivit, formam servi accipiens, in similitudinem hominum factus, et habitu inventus ut homo. ⁸Humiliavit semetipsum factus obediens usque ad mortem, mortem autem crucis. ⁹Propter quod et Deus exaltavit illum, et donavit illi nomen, quod est super omne nomen: ¹⁰ut in nomine Iesu omne genu flectatur caelestium, terrestrium et infernorum, ¹¹et omnis lingua confiteatur, quia Dominus Iesus Christus in gloria est Dei Patris.

²⁶Apud te laus mea in ecclesia magna; vota mea reddam in conspectu timentium eum. ²⁷Edent pauperes, et saturabuntur, et laudabunt Dominum qui requirunt eum: vivent corda eorum in saeculum saeculi. ²⁸Reminiscentur et convertentur ad Dominum universi fines terrae; et adorabunt in conspectu eius universae familiae gentium: ²⁹quoniam Domini est regnum, et ipse dominabitur gentium. ³⁰Manducaverunt et adoraverunt omnes pingues terrae; in conspectu eius cadent omnes qui descendunt in terram. ³¹Et anima mea illi vivet; et semen meum serviet ipsi. ³²Annuntiabitur Domino generatio ventura; et annuntiabunt caeli iustitiam eius populo qui nascetur, quem fecit Dominus.

℟ Apud te laus mea in ecclesia magna.

Haec cum audisset quidam de simul discumbentibus, dixit illi: Beatus qui manducabit panem in regno Dei. ¹⁶At ipse dixit ei: Homo quidam fecit coenam magnam, et vocavit multos. ¹⁷Et misit servum suum hora coenae dicere invitatis ut venirent, quia iam parata sunt omnia. ¹⁸Et coeperunt simul omnes excusare. Primus dixit ei: Villam emi, et necesse habeo exire, et videre illam: rogo te, habe me excusatum. ¹⁹Et alter dixit: Iuga boum emi quinque, et eo probare illa: rogo te, habe me excusatum. ²⁰Et alius dixit: Uxorem duxi, et ideo non possum venire. ²¹Et reversus servus nuntiavit haec domino suo. Tunc iratus paterfamilias, dixit servo suo: Exi cito in plateas et vicos civitatis: et pauperes, ac debiles, et caecos, et claudos introduc huc. ²²Et ait servus: Domine, factum est ut imperasti, et adhuc locus est. ²³Et ait dominus servo: Exi in vias, et saepes: et compelle intrare, ut impleatur domus mea. ²⁴Dico autem vobis quod nemo virorum illorum qui vocati sunt, gustabit coenam meam.