In Commemoratione omnium fidelium defunctorum

Vau Et repulsa est a pace anima mea; oblitus sum bonorum. ¹⁸Vau Et dixi: Periit finis meus, et spes mea a Domino. ¹⁹Zain Recordare paupertatis, et transgressionis meae, absinthii et fellis. ²⁰Zain Memoria memor ero, et tabescet in me anima mea. ²¹Zain Haec recolens in corde meo, ideo sperabo. ²²Heth Misericordiae Domini, quia non sumus consumpti; quia non defecerunt miserationes eius. ²³Heth Novi diluculo, multa est fides tua. ²⁴Heth Pars mea Dominus, dixit anima mea; propterea exspectabo eum. ²⁵Teth Bonus est Dominus sperantibus in eum, animae quaerenti illum. ²⁶Teth Bonum est praestolari cum silentio salutare Dei.

¹Canticum graduum. De profundis clamavi ad te, Domine; ²Domine, exaudi vocem meam. Fiant aures tuae intendentes in vocem deprecationis meae. ³Si iniquitates observaveris, Domine, Domine, quis sustinebit? ⁴Quia apud te propitiatio est; et propter legem tuam sustinui te, Domine. Sustinuit anima mea in verbo eius: ⁵speravit anima mea in Domino. ⁶A custodia matutina usque ad noctem, speret Israël in Domino. ⁷Quia apud Dominum misericordia, et copiosa apud eum redemptio. ⁸Et ipse redimet Israël ex omnibus iniquitatibus eius.

℟ Speravit anima mea in Domino.

Non turbetur cor vestrum. Creditis in Deum, et in me credite. ²In domo Patris mei mansiones multae sunt; si quominus dixissem vobis: quia vado parare vobis locum. ³Et si abiero, et praeparavero vobis locum, iterum venio, et accipiam vos ad meipsum: ut ubi sum ego, et vos sitis. ⁴Et quo ego vado scitis, et viam scitis. ⁵Dicit ei Thomas: Domine, nescimus quo vadis: et quomodo possumus viam scire? ⁶Dicit ei Iesus: Ego sum via, et veritas, et vita. Nemo venit ad Patrem, nisi per me.