Sabbato, hebdomada trigesima prima per annum

Gavisus sum autem in Domino vehementer, quoniam tandem aliquando refloruistis pro me sentire, sicut et sentiebatis: occupati autem eratis. ¹¹Non quasi propter penuriam dico: ego enim didici, in quibus sum, sufficiens esse. ¹²Scio et humiliari, scio et abundare (ubique et in omnibus institutus sum): et satiari, et esurire, et abundare, et penuriam pati. ¹³Omnia possum in eo qui me confortat. ¹⁴Verumtamen bene fecistis, communicantes tribulationi meae. ¹⁵Scitis autem et vos Philippenses, quod in principio Evangelii, quando profectus sum a Macedonia, nulla mihi ecclesia communicavit in ratione dati et accepti, nisi vos soli: ¹⁶quia et Thessalonicam semel et bis in usum mihi misistis. ¹⁷Non quia quaero datum, sed requiro fructum abundantem in ratione vestra. ¹⁸Habeo autem omnia, et abundo: repletus sum, acceptis ab Epaphrodito quae misistis odorem suavitatis, hostiam acceptam, placentem Deo. ¹⁹Deus autem meus impleat omne desiderium vestrum secundum divitias suas in gloria in Christo Iesu.

¹Alleluia, reversionis Aggaei et Zachariae. Beatus vir qui timet Dominum: in mandatis eius volet nimis. ²Potens in terra erit semen eius; generatio rectorum benedicetur. ⁵Iucundus homo qui miseretur et commodat; disponet sermones suos in iudicio: ⁶quia in aeternum non commovebitur. ⁸confirmatum est cor eius; non commovebitur donec despiciat inimicos suos. ⁹Dispersit, dedit pauperibus; iustitia eius manet in saeculum saeculi: cornu eius exaltabitur in gloria.

℟ Beatus vir qui timet Dominum.

Et ego vobis dico: facite vobis amicos de mammona iniquitatis: ut, cum defeceritis, recipiant vos in aeterna tabernacula. ¹⁰Qui fidelis est in minimo, et in maiori fidelis est: et qui in modico iniquus est, et in maiori iniquus est. ¹¹Si ergo in iniquo mammona fideles non fuistis quod verum est, quis credet vobis? ¹²Et si in alieno fideles non fuistis, quod vestrum est, quis dabit vobis? ¹³Nemo servus potest duobus dominis servire: aut enim unum odiet, et alterum diliget: aut uni adhaerebit, et alterum contemnet. Non potestis Deo servire et mammonae. ¹⁴Audiebant autem omnia haec pharisaei, qui erant avari: et deridebant illum. ¹⁵Et ait illis: Vos estis qui iustificatis vos coram hominibus: Deus autem novit corda vestra: quia quod hominibus altum est, abominatio est ante Deum.