Feria sexta, hebdomada trigesima secunda per annum

Gavisus sum valde, quoniam inveni de filiis tuis ambulantes in veritate, sicut mandatum accepimus a Patre. ⁵Et nunc rogo te domina, non tamquam mandatum novum scribens tibi, sed quod habuimus ab initio, ut diligamus alterutrum. ⁶Et haec est caritas, ut ambulemus secundum mandata eius. Hoc est enim mandatum, ut quemadmodum audistis ab initio, in eo ambuletis. ⁷Quoniam multi seductores exierunt in mundum, qui non confitentur Iesum Christum venisse in carnem: hic est seductor, et antichristus. ⁸Videte vosmetipsos, ne perdatis quae operati estis: sed ut mercedem plenam accipiatis. ⁹Omnis qui recedit, et non permanet in doctrina Christi, Deum non habet: qui permanet in doctrina, hic et Patrem et Filium habet.

¹Alleluia. Aleph Beati immaculati in via, qui ambulant in lege Domini. ²Beati qui scrutantur testimonia eius; in toto corde exquirunt eum. ¹⁰In toto corde meo exquisivi te; ne repellas me a mandatis tuis. ¹¹In corde meo abscondi eloquia tua, ut non peccem tibi. ¹⁷Ghimel Retribue servo tuo, vivifica me, et custodiam sermones tuos. ¹⁸Revela oculos meos, et considerabo mirabilia de lege tua.

℟ Beati qui ambulant in lege Domini.

Et sicut factum est in diebus Noë, ita erit et in diebus Filii hominis: ²⁷edebant et bibebant: uxores ducebant et dabantur ad nuptias, usque in diem, qua intravit Noë in arcam: et venit diluvium, et perdidit omnes. ²⁸Similiter sicut factum est in diebus Lot: edebant et bibebant, emebant et vendebant, plantabant et aedificabant: ²⁹qua die autem exiit Lot a Sodomis, pluit ignem et sulphur de caelo, et omnes perdidit: ³⁰secundum haec erit qua die Filius hominis revelabitur. ³¹In illa hora, qui fuerit in tecto, et vasa eius in domo, ne descendat tollere illa: et qui in agro, similiter non redeat retro. ³²Memores estote uxoris Lot. ³³Quicumque quaesierit animam suam salvam facere, perdet illam: et quicumque perdiderit illam, vivificabit eam. ³⁴Dico vobis: In illa nocte erunt duo in lecto uno: unus assumetur, et alter relinquetur: ³⁵duae erunt molentes in unum: una assumetur, et altera relinquetur: duo in agro: unus assumetur, et alter relinquetur. ³⁶Respondentes dicunt illi: Ubi Domine? ³⁷Qui dixit illis: Ubicumque fuerit corpus, illuc congregabuntur et aquilae.