Sabbato, hebdomada trigesima secunda per annum

Carissime, fideliter facis quidquid operaris in fratres, et hoc in peregrinos, ⁶qui testimonium reddiderunt caritati tuae in conspectu ecclesiae: quos, benefaciens, deduces digne Deo. ⁷Pro nomine enim eius profecti sunt, nihil accipientes a gentibus. ⁸Nos ergo debemus suscipere huiusmodi, ut cooperatores simus veritatis.

¹Alleluia, reversionis Aggaei et Zachariae. Beatus vir qui timet Dominum: in mandatis eius volet nimis. ²Potens in terra erit semen eius; generatio rectorum benedicetur. ³Gloria et divitiae in domo eius, et iustitia eius manet in saeculum saeculi. ⁴Exortum est in tenebris lumen rectis: misericors, et miserator, et iustus. ⁵Iucundus homo qui miseretur et commodat; disponet sermones suos in iudicio: ⁶quia in aeternum non commovebitur.

℟ Beatus vir qui timet Dominum.

Dicebat autem et parabolam ad illos, quoniam oportet semper orare et non deficere, ²dicens: Iudex quidam erat in quadam civitate, qui Deum non timebat, et hominem non reverebatur. ³Vidua autem quaedam erat in civitate illa, et veniebat ad eum, dicens: Vindica me de adversario meo. ⁴Et nolebat per multum tempus. Post haec autem dixit intra se: Etsi Deum non timeo, nec hominem revereor: ⁵tamen quia molesta est mihi haec vidua, vindicabo illam, ne in novissimo veniens sugillet me. ⁶Ait autem Dominus: Audite quid iudex iniquitatis dicit: ⁷Deus autem non faciet vindictam electorum suorum clamantium ad se die ac nocte, et patientiam habebit in illis? ⁸Dico vobis quia cito faciet vindictam illorum. Verumtamen Filius hominis veniens, putas, inveniet fidem in terra?