Feria sexta, hebdomada trigesima tertia per annum

Et audivi vocem de caelo iterum loquentem mecum, et dicentem: Vade, et accipe librum apertum de manu angeli stantis super mare, et super terram. ⁹Et abii ad angelum, dicens ei, ut daret mihi librum. Et dixit mihi: Accipe librum, et devora illum: et faciet amaricari ventrem tuum, sed in ore tuo erit dulce tamquam mel. ¹⁰Et accepi librum de manu angeli, et devoravi illum: et erat in ore meo tamquam mel dulce, et cum devorassem eum, amaricatus est venter meus: ¹¹et dixit mihi: Oportet te iterum prophetare gentibus, et populis, et linguis, et regibus multis.

¹⁴In via testimoniorum tuorum delectatus sum, sicut in omnibus divitiis. ²⁴Nam et testimonia tua meditatio mea est, et consilium meum iustificationes tuae. ⁷²Bonum mihi lex oris tui, super millia auri et argenti. ¹⁰³Quam dulcia faucibus meis eloquia tua! super mel ori meo. ¹¹¹Haereditate acquisivi testimonia tua in aeternum, quia exsultatio cordis mei sunt. ¹³¹Os meum aperui, et attraxi spiritum: quia mandata tua desiderabam.

℟ Quam dulcia faucibus meis eloquia tua!

Et ingressus in templum, coepit eiicere vendentes in illo, et ementes, ⁴⁶dicens illis: Scriptum est: Quia domus mea domus orationis est: vos autem fecistis illam speluncam latronum. ⁴⁷Et erat docens quotidie in templo. Principes autem sacerdotum, et scribae, et princeps plebis quaerebant illum perdere: ⁴⁸et non inveniebant quid facerent illi. Omnis enim populus suspensus erat, audiens illum.