Feria quarta, hebdomada trigesima quartra per annum

Et vidi aliud signum in caelo magnum et mirabile, angelos septem, habentes plagas septem novissimas: quoniam in illis consummata est ira Dei. ²Et vidi tamquam mare vitreum mistum igne, et eos, qui vicerunt bestiam, et imaginem eius, et numerum nominis eius, stantes super mare vitreum, habentes citharas Dei: ³et cantantes canticum Moysi servi Dei, et canticum Agni, dicentes: Magna et mirabilia sunt opera tua, Domine Deus omnipotens: iustae et verae sunt viae tuae, Rex saeculorum. ⁴Quis non timebit te, Domine, et magnificabit nomen tuum? quia solus pius es: quoniam omnes gentes venient, et adorabunt in conspectu tuo, quoniam iudicia tua manifesta sunt.

¹Psalmus ipsi David. Cantate Domino canticum novum, quia mirabilia fecit. Salvavit sibi dextera eius, et brachium sanctum eius. ²Notum fecit Dominus salutare suum; in conspectu gentium revelavit iustitiam suam. ³Recordatus est misericordiae suae, et veritatis suae domui Israël. Viderunt omnes termini terrae salutare Dei nostri. ⁷moveatur mare, et plenitudo eius; orbis terrarum, et qui habitant in eo. ⁸Flumina plaudent manu; simul montes exsultabunt ⁹a conspectu Domini: quoniam venit iudicare terram. Iudicabit orbem terrarum in iustitia, et populos in aequitate.

℟ Magna et mirabilia sunt opera tua, Domine Deus omnipotens.

Sed ante haec omnia iniicient vobis manus suas, et persequentur tradentes in synagogas et custodias, trahentes ad reges et praesides propter nomen meum: ¹³continget autem vobis in testimonium. ¹⁴Ponite ergo in cordibus vestris non praemeditari quemadmodum respondeatis: ¹⁵ego enim dabo vobis os et sapientiam, cui non poterunt resistere et contradicere omnes adversarii vestri. ¹⁶Trademini autem a parentibus, et fratribus, et cognatis, et amicis, et morte afficient ex vobis: ¹⁷et eritis odio omnibus propter nomen meum: ¹⁸et capillus de capite vestro non peribit. ¹⁹In patientia vestra possidebitis animas vestras.