Sabbato, hebdomada trigesima quartra per annum

Et ostendit mihi fluvium aquae vitae, splendidum tamquam crystallum, procedentem de sede Dei et Agni. ²In medio plateae eius, et ex utraque parte fluminis, lignum vitae, afferens fructus duodecim per menses singulos, reddens fructum suum et folia ligni ad sanitatem gentium. ³Et omne maledictum non erit amplius: sed sedes Dei et Agni in illa erunt, et servi eius servient illi. ⁴Et videbunt faciem eius: et nomen eius in frontibus eorum. ⁵Et nox ultra non erit: et non egebunt lumine lucernae, neque lumine solis, quoniam Dominus Deus illuminabit illos, et regnabunt in saecula saeculorum. ⁶Et dixit mihi: Haec verba fidelissima sunt, et vera. Et Dominus Deus spirituum prophetarum misit angelum suum ostendere servis suis quae oportet fieri cito. ⁷Et ecce venio velociter. Beatus, qui custodit verba prophetiae libri huius.

¹Laus cantici ipsi David. Venite, exsultemus Domino; iubilemus Deo salutari nostro; ²praeoccupemus faciem eius in confessione, et in psalmis iubilemus ei: ³quoniam Deus magnus Dominus, et rex magnus super omnes deos. ⁴Quia in manu eius sunt omnes fines terrae, et altitudines montium ipsius sunt; ⁵quoniam ipsius est mare, et ipse fecit illud, et siccam manus eius formaverunt. ⁶Venite, adoremus, et procidamus, et ploremus ante Dominum qui fecit nos: ⁷quia ipse est Dominus Deus noster, et nos populus pascuae eius, et oves manus eius.

℟ Veni, Domine Iesu.

Attendite autem vobis, ne forte graventur corda vestra in crapula, et ebrietate, et curis huius vitae, et superveniat in vos repentina dies illa: ³⁵tamquam laqueus enim superveniet in omnes qui sedent super faciem omnis terrae. ³⁶Vigilate itaque, omni tempore orantes, ut digni habeamini fugere ista omnia quae futura sunt, et stare ante Filium hominis.