Feria tertia, hebdomada prima Adventus

Et egredietur virga de radice Iesse, et flos de radice eius ascendet. ²Et requiescet super eum spiritus Domini: spiritus sapientiae et intellectus, spiritus consilii et fortitudinis, spiritus scientiae et pietatis; ³et replebit eum spiritus timoris Domini. Non secundum visionem oculorum iudicabit, neque secundum auditum aurium arguet; ⁴sed iudicabit in iustitia pauperes, et arguet in aequitate pro mansuetis terrae; et percutiet terram virga oris sui, et spiritu labiorum suorum interficiet impium. ⁵Et erit iustitia cingulum lumborum eius, et fides cinctorium renum eius. ⁶Habitabit lupus cum agno, et pardus cum haedo accubabit; vitulus, et leo, et ovis, simul morabuntur, et puer parvulus minabit eos. ⁷Vitulus et ursus pascentur, simul requiescent catuli eorum; et leo quasi bos comedet paleas. ⁸Et delectabitur infans ab ubere super foramine aspidis; et in caverna reguli qui ablactatus fuerit manum suam mittet. ⁹Non nocebunt, et non occident in universo monte sancto meo, quia repleta est terra scientia Domini, sicut aquae maris operientes. ¹⁰In die illa radix Iesse, qui stat in signum populorum, ipsum gentes deprecabuntur, et erit sepulchrum eius gloriosum.

¹Psalmus, in Salomonem. ²Deus, iudicium tuum regi da, et iustitiam tuam filio regis; iudicare populum tuum in iustitia, et pauperes tuos in iudicio. ⁷Orietur in diebus eius iustitia, et abundantia pacis, donec auferatur luna. ⁸Et dominabitur a mari usque ad mare, et a flumine usque ad terminos orbis terrarum. ¹²Quia liberabit pauperem a potente, et pauperem cui non erat adiutor. ¹³Parcet pauperi et inopi, et animas pauperum salvas faciet. ¹⁷Sit nomen eius benedictum in saecula; ante solem permanet nomen eius. Et benedicentur in ipso omnes tribus terrae; omnes gentes magnificabunt eum.

℟ Orietur in diebus eius iustitia, et abundantia pacis.

In ipsa hora exsultavit Spiritu Sancto, et dixit: Confiteor tibi Pater, Domine caeli et terrae, quod abscondisti haec a sapientibus et prudentibus, et revelasti ea parvulis. Etiam Pater: quoniam sic placuit ante te. ²²Omnia mihi tradita sunt a Patre meo. Et nemo scit quis sit Filius, nisi Pater: et quis sit Pater, nisi Filius, et cui voluerit Filius revelare. ²³Et conversus ad discipulos suos, dixit: Beati oculi qui vident quae vos videtis. ²⁴Dico enim vobis quod multi prophetae et reges voluerunt videre quae vos videtis, et non viderunt: et audire quae auditis, et non audierunt.