Sabbato, hebdomada prima Adventus

Populus enim Sion habitabit in Ierusalem: plorans nequaquam plorabis: miserans miserebitur tui, ad vocem clamoris tui: statim ut audierit, respondebit tibi. ²⁰Et dabit vobis Dominus panem arctum, et aquam brevem; et non faciet avolare a te ultra doctorem tuum; et erunt oculi tui videntes praeceptorem tuum. ²¹Et aures tuae audient verbum post tergum monentis: Haec est via; ambulate in ea, et non declinetis neque ad dexteram, neque ad sinistram. ²³Et dabitur pluvia semini tuo, ubicumque seminaveris in terra, et panis frugum terrae erit uberrimus et pinguis; pascetur in possessione tua in die illo agnus spatiose, ²⁴et tauri tui, et pulli asinorum, qui operantur terram, commistum migma comedent sicut in area ventilatum est. ²⁵Et erunt super omnem montem excelsum, et super omnem collem elevatum, rivi currentium aquarum, in die interfectionis multorum, cum ceciderint turres: ²⁶et erit lux lunae sicut lux solis, et lux solis erit septempliciter sicut lux septem dierum, in die qua alligaverit Dominus vulnus populi sui, et percussuram plagae eius sanaverit.

¹Alleluia. Laudate Dominum, quoniam bonus est psalmus; Deo nostro sit iucunda, decoraque laudatio. ²Aedificans Ierusalem Dominus, dispersiones Israëlis congregabit: ³qui sanat contritos corde, et alligat contritiones eorum; ⁴qui numerat multitudinem stellarum, et omnibus eis nomina vocat. ⁵Magnus Dominus noster, et magna virtus eius, et sapientiae eius non est numerus. ⁶Suscipiens mansuetos Dominus; humilians autem peccatores usque ad terram.

℟ Beati omnes qui exspectant eum.

Et circuibat Iesus omnes civitates, et castella, docens in synagogis eorum, et praedicans Evangelium regni, et curans omnem languorem, et omnem infirmitatem. ³⁶Videns autem turbas, misertus est eis: quia erant vexati, et iacentes sicut oves non habentes pastorem. ³⁷Tunc dicit discipulis suis: Messis quidem multa, operarii autem pauci. ³⁸Rogate ergo Dominum messis, ut mittat operarios in messem suam.

¹Et convocatis duodecim discipulis suis, dedit illis potestatem spirituum immundorum, ut eiicerent eos, et curarent omnem languorem, et omnem infirmitatem. ⁶sed potius ite ad oves quae perierunt domus Israël. ⁷Euntes autem praedicate, dicentes: Quia appropinquavit regnum caelorum. ⁸Infirmos curate, mortuos suscitate, leprosos mundate, daemones eiicite: gratis accepistis, gratis date.