Feria sexta, hebdomada prima Adventus

Nonne adhuc in modico et in brevi convertetur Libanus in carmel, et carmel in saltum reputabitur? ¹⁸Et audient in die illa surdi verba libri, et de tenebris et caligine oculi caecorum videbunt. ¹⁹Et addent mites in Domino laetitiam, et pauperes homines in Sancto Israël exsultabunt; ²⁰quoniam defecit qui praevalebat, consummatus est illusor, et succisi sunt omnes qui vigilabant super iniquitatem, ²¹qui peccare faciebant homines in verbo, et arguentem in porta supplantabant, et declinaverunt frustra a iusto. ²²Propter hoc, haec dicit Dominus ad domum Iacob, qui redemit Abraham: Non modo confundetur Iacob, nec modo vultus eius erubescet; ²³sed cum viderit filios suos, opera manuum mearum in medio sui sanctificantes nomen meum, et sanctificabunt Sanctum Iacob, et Deum Israël praedicabunt; ²⁴et scient errantes spiritu intellectum, et mussitatores discent legem.

¹Psalmus David, priusquam liniretur. Dominus illuminatio mea et salus mea: quem timebo? Dominus protector vitae meae: a quo trepidabo? ⁴Unam petii a Domino, hanc requiram, ut inhabitem in domo Domini omnibus diebus vitae meae; ut videam voluptatem Domini, et visitem templum eius. ¹³Credo videre bona Domini in terra viventium. ¹⁴Expecta Dominum, viriliter age: et confortetur cor tuum, et sustine Dominum.

℟ Dominus illuminatio mea et salus mea.

Et transeunte inde Iesu, secuti sunt eum duo caeci, clamantes, et dicentes: Miserere nostri, fili David. ²⁸Cum autem venisset domum, accesserunt ad eum caeci. Et dicit eis Iesus: Creditis quia hoc possum facere vobis? Dicunt ei: Utique, Domine. ²⁹Tunc tetigit oculos eorum, dicens: Secundum fidem vestram, fiat vobis. ³⁰Et aperti sunt oculi eorum: et comminatus est illis Iesus, dicens: Videte ne quis sciat. ³¹Illi autem exeuntes, diffamaverunt eum in tota terra illa.