Dominica prima Adventus

Tu enim pater noster: et Abraham nescivit nos, et Israël ignoravit nos: tu, Domine, pater noster, redemptor noster, a saeculo nomen tuum. ¹⁷Quare errare nos fecisti, Domine, de viis tuis; indurasti cor nostrum ne timeremus te? Convertere propter servos tuos, tribus haereditatis tuae. ¹sicut exustio ignis tabescerent, aquae arderent igni: ut notum fieret nomen tuum inimicis tuis; a facie tua gentes turbarentur. ²Cum feceris mirabilia, non sustinebimus; descendisti, et a facie tua montes defluxerunt. ³A saeculo non audierunt, neque auribus perceperunt; oculus non vidit, Deus, absque te, quae praeparasti exspectantibus te. ⁴Occurristi laetanti, et facienti iustitiam; in viis tuis recordabuntur tui. Ecce tu iratus es, et peccavimus; in ipsis fuimus semper, et salvabimur. ⁵Et facti sumus ut immundus omnes nos, et quasi pannus menstruatae universae iustitiae nostrae; et cecidimus quasi folium universi, et iniquitates nostrae quasi ventus abstulerunt nos. ⁶Non est qui invocet nomen tuum; qui consurgat, et teneat te. Abscondisti faciem tuam a nobis, et allisisti nos in manu iniquitatis nostrae. ⁷Et nunc, Domine, pater noster es tu, nos vero lutum; et fictor noster tu, et opera manuum tuarum omnes nos.

²Qui regis Israël, intende; qui deducis velut ovem Ioseph. Qui sedes super cherubim, manifestare ³coram Ephraim, Beniamin, et Manasse. Excita potentiam tuam, et veni, ut salvos facias nos. ¹⁵Deus virtutum, convertere, respice de caelo, et vide, et visita vineam istam: ¹⁶et perfice eam quam plantavit dextera tua, et super filium hominis quem confirmasti tibi. ¹⁸Fiat manus tua super virum dexterae tuae, et super filium hominis quem confirmasti tibi. ¹⁹Et non discedimus a te: vivificabis nos, et nomen tuum invocabimus.

℟ Deus, converte nos, et ostende faciem tuam, et salvi erimus.

Gratia vobis, et pax a Deo Patre nostro, et Domino Iesu Christo. ⁴Gratias ago Deo meo semper pro vobis in gratia Dei, quae data est vobis in Christo Iesu: ⁵quod in omnibus divites facti estis in illo, in omni verbo, et in omni scientia. ⁶Sicut testimonium Christi confirmatum est in vobis: ⁷ita ut nihil vobis desit in ulla gratia, exspectantibus revelationem Domini nostri Iesu Christi, ⁸qui et confirmabit vos usque in finem sine crimine, in die adventus Domini nostri Iesu Christi. ⁹Fidelis Deus: per quem vocati estis in societatem filii eius Iesu Christi Domini nostri.

Videte, vigilate, et orate: nescitis enim quando tempus sit. ³⁴Sicut homo qui peregre profectus reliquit domum suam, et dedit servis suis potestatem cuiusque operis, et ianitori praecepit ut vigilet, ³⁵vigilate ergo (nescitis enim quando dominus domus veniat: sero, an media nocte, an galli cantu, an mane), ³⁶ne, cum venerit repente, inveniat vos dormientes. ³⁷Quod autem vobis dico, omnibus dico: Vigilate.