Ss. Andreae Dũng Lạc, presbyteri, et sociorum, martyrum

Et vidi: et ecce nubem candidam, et super nubem sedentem similem Filio hominis, habentem in capite suo coronam auream, et in manu sua falcem acutam. ¹⁵Et alius angelus exivit de templo, clamans voce magna ad sedentem super nubem: Mitte falcem tuam, et mete, quia venit hora ut metatur, quoniam aruit messis terrae. ¹⁶Et misit qui sedebat super nubem, falcem suam in terram, et demessa est terra. ¹⁷Et alius angelus exivit de templo, quod est in caelo, habens et ipse falcem acutam. ¹⁸Et alius angelus exivit de altari, qui habebat potestatem supra ignem: et clamavit voce magna ad eum qui habebat falcem acutam, dicens: Mitte falcem tuam acutam, et vindemia botros vineae terrae: quoniam maturae sunt uvae eius. ¹⁹Et misit angelus falcem suam acutam in terram, et vindemiavit vineam terrae, et misit in lacum irae Dei magnum:

¹⁰dicite in gentibus, quia Dominus regnavit. Etenim correxit orbem terrae, qui non commovebitur; iudicabit populos in aequitate. ¹¹Laetentur caeli, et exsultet terra; commoveatur mare et plenitudo eius; ¹²gaudebunt campi, et omnia quae in eis sunt. Tunc exsultabunt omnia ligna silvarum ¹³a facie Domini, quia venit, quoniam venit iudicare terram. Iudicabit orbem terrae in aequitate, et populos in veritate sua.

℟ Venit iudicare terram.

Et quibusdam dicentibus de templo quod bonis lapidibus et donis ornatum esset, dixit: ⁶Haec quae videtis, venient dies in quibus non relinquetur lapis super lapidem, qui non destruatur. ⁷Interrogaverunt autem illum, dicentes: Praeceptor, quando haec erunt, et quod signum cum fieri incipient? ⁸Qui dixit: Videte ne seducamini: multi enim venient in nomine meo, dicentes quia ego sum: et tempus appropinquavit: nolite ergo ire post eos. ⁹Cum autem audieritis praelia et seditiones, nolite terreri: oportet primum haec fieri, sed nondum statim finis. ¹⁰Tunc dicebat illis: Surget gens contra gentem, et regnum adversus regnum. ¹¹Et terraemotus magni erunt per loca, et pestilentiae, et fames, terroresque de caelo, et signa magna erunt.