Feria secunda, hebdomada trigesima tertia per annum

Apocalypsis Iesu Christi, quam dedit illi Deus palam facere servis suis, quae oportet fieri cito: et significavit, mittens per angelum suum servo suo Ioanni, ²qui testimonium perhibuit verbo Dei, et testimonium Iesu Christi, quaecumque vidit. ³Beatus qui legit, et audit verba prophetiae huius, et servat ea, quae in ea scripta sunt: tempus enim prope est. ⁴Ioannes septem ecclesiis, quae sunt in Asia. Gratia vobis, et pax ab eo, qui est, et qui erat, et qui venturus est: et a septem spiritibus qui in conspectu throni eius sunt:

¹Angelo Ephesi ecclesiae scribe: Haec dicit, qui tenet septem stellas in dextera sua, qui ambulat in medio septem candelabrorum aureorum: ²Scio opera tua, et laborem, et patientiam tuam, et quia non potes sustinere malos: et tentasti eos, qui se dicunt apostolos esse, et non sunt: et invenisti eos mendaces: ³et patientiam habes, et sustinuisti propter nomen meum, et non defecisti. ⁴Sed habeo adversum te, quod caritatem tuam primam reliquisti. ⁵Memor esto itaque unde excideris: et age poenitentiam, et prima opera fac: sin autem, venio tibi, et movebo candelabrum tuum de loco suo, nisi poenitentiam egeris.

¹Beatus vir qui non abiit in consilio impiorum, et in via peccatorum non stetit, et in cathedra pestilentiae non sedit; ²sed in lege Domini voluntas eius, et in lege eius meditabitur die ac nocte. ³Et erit tamquam lignum quod plantatum est secus decursus aquarum, quod fructum suum dabit in tempore suo: et folium eius non defluet; et omnia quaecumque faciet prosperabuntur. ⁴Non sic impii, non sic; sed tamquam pulvis quem proiicit ventus a facie terrae. ⁶quoniam novit Dominus viam iustorum, et iter impiorum peribit.

℟ Vincenti dabo edere de ligno vitae.

Factum est autem, cum appropinquaret Iericho, caecus quidam sedebat secus viam, mendicans. ³⁶Et cum audiret turbam praetereuntem, interrogabat quid hoc esset. ³⁷Dixerunt autem ei quod Iesus Nazarenus transiret. ³⁸Et clamavit, dicens: Iesu, fili David, miserere mei. ³⁹Et qui praeibant, increpabant eum ut taceret. Ipse vero multo magis clamabat: Fili David, miserere mei. ⁴⁰Stans autem Iesus iussit illum adduci ad se. Et cum appropinquasset, interrogavit illum, ⁴¹dicens: Quid tibi vis faciam? At ille dixit: Domine, ut videam. ⁴²Et Iesus dixit illi: Respice, fides tua te salvum fecit. ⁴³Et confestim vidit, et sequebatur illum magnificans Deum. Et omnis plebs ut vidit, dedit laudem Deo.