S. Leonis Magni, papae et Ecclesiae doctoris

Tu autem loquere quae decent sanam doctrinam: ²senes ut sobrii sint, pudici, prudentes, sani in fide, in dilectione, in patientia: ³anus similiter in habitu sancto, non criminatrices, non multo vino servientes, bene docentes: ⁴ut prudentiam doceant adolescentulas, ut viros suos ament, filios suos diligant, ⁵prudentes, castas, sobrias, domus curam habentes, benignas, subditas viris suis, ut non blasphemetur verbum Dei. ⁶Iuvenes similiter hortare ut sobrii sint. ⁷In omnibus teipsum praebe exemplum bonorum operum, in doctrina, in integritate, in gravitate, ⁸verbum sanum, irreprehensibile: ut is qui ex adverso est, vereatur, nihil habens malum dicere de nobis. ¹¹Apparuit enim gratia Dei Salvatoris nostri omnibus hominibus, ¹²erudiens nos, ut abnegantes impietatem, et saecularia desideria, sobrie, et iuste, et pie vivamus in hoc saeculo, ¹³exspectantes beatam spem, et adventum gloriae magni Dei, et Salvatoris nostri Iesu Christi: ¹⁴qui dedit semetipsum pro nobis, ut nos redimeret ab omni iniquitate, et mundaret sibi populum acceptabilem, sectatorem bonorum operum.

³Spera in Domino, et fac bonitatem; et inhabita terram, et pasceris in divitiis eius. ⁴Delectare in Domino, et dabit tibi petitiones cordis tui. ¹⁸Novit Dominus dies immaculatorum, et haereditas eorum in aeternum erit. ²³Apud Dominum gressus hominis dirigentur, et viam eius volet. ²⁷Declina a malo, et fac bonum, et inhabita in saeculum saeculi: ²⁹Iusti autem haereditabunt terram, et inhabitabunt in saeculum saeculi super eam.

℟ Salus iustorum a Domino.

Quis autem vestrum habens servum arantem aut pascentem, qui regresso de agro dicat illi: Statim transi, recumbe: ⁸et non dicat ei: Para quod coenem, et praecinge te, et ministra mihi donec manducem, et bibam, et post haec tu manducabis, et bibes? ⁹Numquid gratiam habet servo illi, quia fecit quae ei imperaverat? ¹⁰non puto. Sic et vos cum feceritis omnia quae praecepta sunt vobis, dicite: Servi inutiles sumus: quod debuimus facere, fecimus.