In Dedicatione Basilicae Lateranensis

Et convertit me ad portam domus, et ecce aquae egrediebantur subter limen domus ad orientem: facies enim domus respiciebat ad orientem, aquae autem descendebant in latus templi dextrum, ad meridiem altaris. ²Et eduxit me per viam portae aquilonis, et convertit me ad viam foras portam exteriorem, viam quae respiciebat ad orientem: et ecce aquae redundantes a latere dextro. ⁸Et ait ad me: Aquae istae quae egrediuntur ad tumulos sabuli orientalis, et descendunt ad plana deserti, intrabunt mare et exibunt: et sanabuntur aquae. ⁹Et omnis anima vivens quae serpit quocumque venerit torrens, vivet: et erunt pisces multi satis, postquam venerint illuc aquae istae: et sanabuntur et vivent omnia ad quae venerit torrens. ¹²Et super torrentem orietur in ripis eius, ex utraque parte, omne lignum pomiferum: non defluet folium ex eo, et non deficiet fructus eius: per singulos menses afferet primitiva, quia aquae eius de sanctuario egredientur: et erunt fructus eius in cibum, et folia eius ad medicinam.

²Deus noster refugium et virtus; adiutor in tribulationibus quae invenerunt nos nimis. ³Propterea non timebimus dum turbabitur terra, et transferentur montes in cor maris. ⁵Fluminis impetus laetificat civitatem Dei: sanctificavit tabernaculum suum Altissimus. ⁶Deus in medio eius, non commovebitur; adiuvabit eam Deus mane diluculo. ⁸Dominus virtutum nobiscum; susceptor noster Deus Iacob. ⁹Venite, et videte opera Domini, quae posuit prodigia super terram,

℟ Fluminis impetus laetificat civitatem Dei.

Et prope erat Pascha Iudaeorum, et ascendit Iesus Ierosolymam: ¹⁴et invenit in templo vendentes boves, et oves, et columbas, et numularios sedentes. ¹⁵Et cum fecisset quasi flagellum de funiculis, omnes eiecit de templo, oves quoque, et boves, et numulariorum effudit aes, et mensas subvertit. ¹⁶Et his qui columbas vendebant, dixit: Auferte ista hinc, et nolite facere domum patris mei, domum negotiationis. ¹⁷Recordati sunt vero discipuli eius quia scriptum est: Zelus domus tuae comedit me. ¹⁸Responderunt ergo Iudaei, et dixerunt ei: Quod signum ostendis nobis, quia haec facis? ¹⁹Respondit Iesus, et dixit eis: Solvite templum hoc, et in tribus diebus excitabo illud. ²⁰Dixerunt ergo Iudaei: Quadraginta et sex annis aedificatum est templum hoc, et tu in tribus diebus excitabis illud? ²¹Ille autem dicebat de templo corporis sui. ²²Cum ergo resurrexisset a mortuis, recordati sunt discipuli eius, quia hoc dicebat, et crediderunt scripturae et sermoni quem dixit Iesus.