Ezechiel 46

¹Haec dicit Dominus Deus: Porta atrii interioris quae respicit ad orientem, erit clausa sex diebus in quibus opus fit: die autem sabbati aperietur, sed et in die calendarum aperietur. ²Et intrabit princeps per viam vestibuli portae deforis, et stabit in limine portae: et facient sacerdotes holocaustum eius, et pacifica eius: et adorabit super limen portae, et egredietur: porta autem non claudetur usque ad vesperam. ³Et adorabit populus terrae ad ostium portae illius in sabbatis et in calendis coram Domino. ⁴Holocaustum autem hoc offeret princeps Domino: in die sabbati, sex agnos immaculatos, et arietem immaculatum, ⁵et sacrificium ephi per arietem, in agnis autem sacrificium quod dederit manus eius, et olei hin per singula ephi. ⁶In die autem calendarum vitulum de armento immaculatum, et sex agni et arietes immaculati erunt. ⁷Et ephi per vitulum, ephi quoque per arietem faciet sacrificium: de agnis autem sicut invenerit manus eius, et olei hin per singula ephi.

⁸Cumque ingressurus est princeps, per viam vestibuli portae ingrediatur, et per eamdem viam exeat. ⁹Et cum intrabit populus terrae in conspectu Domini in solemnitatibus, qui ingreditur per portam aquilonis ut adoret, egrediatur per viam portae meridianae: porro qui ingreditur per viam portae meridianae, egrediatur per viam portae aquilonis. Non revertetur per viam portae per quam ingressus est, sed e regione illius egredietur. ¹⁰Princeps autem in medio eorum cum ingredientibus ingredietur, et cum egredientibus egredietur.

¹¹Et in nundinis, et in solemnitatibus, erit sacrificium ephi per vitulum, et ephi per arietem: agnis autem erit sacrificium sicut invenerit manus eius, et olei hin per singula ephi.

¹²Cum autem fecerit princeps spontaneum holocaustum, aut pacifica voluntaria Domino, aperietur ei porta quae respicit ad orientem, et faciet holocaustum suum et pacifica sua, sicut fieri solet in die sabbati: et egredietur, claudeturque porta postquam exierit.

¹³Et agnum eiusdem anni immaculatum faciet holocaustum quotidie Domino: semper mane faciet illud. ¹⁴Et faciet sacrificium super eo cata mane mane sextam partem ephi, et de oleo tertiam partem hin, ut misceatur similae: sacrificium Domino legitimum, iuge atque perpetuum. ¹⁵Faciet agnum, et sacrificium, et oleum cata mane mane, holocaustum sempiternum.

¹⁶Haec dicit Dominus Deus: Si dederit princeps donum alicui de filiis suis, haereditas eius filiorum suorum erit: possidebunt eam haereditarie. ¹⁷Si autem dederit legatum de haereditate sua uni servorum suorum, erit illius usque ad annum remissionis, et revertetur ad principem: haereditas autem eius filiis eius erit. ¹⁸Et non accipiet princeps de haereditate populi per violentiam, et de possessione eorum: sed de possessione sua haereditatem dabit filiis suis, ut non dispergatur populus meus unusquisque a possessione sua.

¹⁹Et introduxit me per ingressum qui erat ex latere portae, in gazophylacia sanctuarii ad sacerdotes, quae respiciebant ad aquilonem: et erat ibi locus vergens ad occidentem.

²⁰Et dixit ad me: Iste est locus ubi coquent sacerdotes pro peccato et pro delicto: ubi coquent sacrificium, ut non efferant in atrium exterius, et sanctificetur populus.

²¹Et eduxit me in atrium exterius, et circumduxit me per quatuor angulos atrii: et ecce atriolum erat in angulo atrii, atriola singula per angulos atrii. ²²In quatuor angulis atrii atriola disposita, quadraginta cubitorum per longum, et triginta per latum: mensurae unius quatuor erant. ²³Et paries per circuitum ambiens quatuor atriola: et culinae fabricatae erant subter porticus per gyrum. ²⁴Et dixit ad me: Haec est domus culinarum, in qua coquent ministri domus Domini victimas populi.