S. Teresiae a Iesu, virginis et Ecclesiae doctoris

Qui timet Deum faciet bona, et qui continens est iustitiae apprehendet illam: ²et obviabit illi quasi mater honorificata, et quasi mulier a virginitate suscipiet illum. ³Cibabit illum pane vitae et intellectus, et aqua sapientiae salutaris potabit illum: et firmabitur in illo, et non flectetur: ⁴et continebit illum, et non confundetur: et exaltabit illum apud proximos suos, ⁵et in medio ecclesiae aperiet os eius, et adimplebit illum spiritu sapientiae et intellectus, et stola gloriae vestiet illum. ⁶Iucunditatem et exsultationem thesaurizabit super illum, et nomine aeterno haereditabit illum.

²Misericordias Domini in aeternum cantabo; in generationem et generationem annuntiabo veritatem tuam in ore meo. ³Quoniam dixisti: In aeternum misericordia aedificabitur in caelis; praeparabitur veritas tua in eis. ⁶Confitebuntur caeli mirabilia tua, Domine; etenim veritatem tuam in ecclesia sanctorum. ⁷Quoniam quis in nubibus aequabitur Domino; similis erit Deo in filiis Dei? ⁸Deus, qui glorificatur in consilio sanctorum, magnus et terribilis super omnes qui in circuitu eius sunt. ⁹Domine Deus virtutum, quis similis tibi? potens es, Domine, et veritas tua in circuitu tuo. ¹⁶Beatus populus qui scit iubilationem: Domine, in lumine vultus tui ambulabunt, ¹⁷et in nomine tuo exsultabunt tota die, et in iustitia tua exaltabuntur. ¹⁸Quoniam gloria virtutis eorum tu es, et in beneplacito tuo exaltabitur cornu nostrum. ¹⁹Quia Domini est assumptio nostra, et sancti Israël regis nostri.

℟ Misericordias Domini in aeternum cantabo.

In illo tempore respondens Iesus dixit: Confiteor tibi, Pater, Domine caeli et terrae, quia abscondisti haec a sapientibus, et prudentibus, et revelasti ea parvulis. ²⁶Ita Pater: quoniam sic fuit placitum ante te. ²⁷Omnia mihi tradita sunt a Patre meo. Et nemo novit Filium, nisi Pater: neque Patrem quis novit, nisi Filius, et cui voluerit Filius revelare. ²⁸Venite ad me omnes qui laboratis, et onerati estis, et ego reficiam vos. ²⁹Tollite iugum meum super vos, et discite a me, quia mitis sum, et humilis corde: et invenietis requiem animabus vestris. ³⁰Iugum enim meum suave est, et onus meum leve.