Feria sexta, hebdomada vigesima octava per annum

in quo etiam et nos sorte vocati sumus praedestinati secundum propositum eius qui operatur omnia secundum consilium voluntatis suae: ¹²ut simus in laudem gloriae eius nos, qui ante speravimus in Christo; ¹³in quo et vos, cum audissetis verbum veritatis, Evangelium salutis vestrae, in quo et credentes signati estis Spiritu promissionis Sancto, ¹⁴qui est pignus haereditatis nostrae, in redemptionem acquisitionis, in laudem gloriae ipsius.

¹Psalmus David. Exsultate, iusti, in Domino; rectos decet collaudatio. ²Confitemini Domino in cithara; in psalterio decem chordarum psallite illi. ⁴Quia rectum est verbum Domini, et omnia opera eius in fide. ⁵Diligit misericordiam et iudicium; misericordia Domini plena est terra. ¹²Beata gens cuius est Dominus Deus eius; populus quem elegit in haereditatem sibi. ¹³De caelo respexit Dominus; vidit omnes filios hominum.

℟ Beatus populus quem elegit Dominus in haereditatem sibi.

Multis autem turbis circumstantibus, ita ut se invicem conculcarent, coepit dicere ad discipulos suos: Attendite a fermento pharisaeorum, quod est hypocrisis. ²Nihil autem opertum est, quod non reveletur: neque absconditum, quod non sciatur. ³Quoniam quae in tenebris dixistis, in lumine dicentur: et quod in aurem locuti estis in cubiculis, praedicabitur in tectis. ⁴Dico autem vobis amicis meis: Ne terreamini ab his qui occidunt corpus, et post haec non habent amplius quid faciant. ⁵Ostendam autem vobis quem timeatis: timete eum qui, postquam occiderit, habet potestatem mittere in gehennam: ita dico vobis, hunc timete. ⁶Nonne quinque passeres veneunt dipondio, et unus ex illis non est in oblivione coram Deo? ⁷sed et capilli capitis vestri omnes numerati sunt. Nolite ergo timere: multis passeribus pluris estis vos.