Feria quinta, hebdomada vigesima nona per annum

Huius rei gratia flecto genua mea ad Patrem Domini nostri Iesu Christi, ¹⁵ex quo omnis paternitas in caelis et in terra nominatur, ¹⁶ut det vobis secundum divitias gloriae suae, virtute corroborari per Spiritum eius in interiorem hominem, ¹⁷Christum habitare per fidem in cordibus vestris: in caritate radicati, et fundati, ¹⁸ut possitis comprehendere cum omnibus sanctis, quae sit latitudo, et longitudo, et sublimitas, et profundum: ¹⁹scire etiam supereminentem scientiae caritatem Christi, ut impleamini in omnem plenitudinem Dei. ²⁰Ei autem, qui potens est omnia facere superabundanter quam petimus aut intelligimus, secundum virtutem, quae operatur in nobis: ²¹ipsi gloria in Ecclesia, et in Christo Iesu, in omnes generationes saeculi saeculorum. Amen.

¹Psalmus David. Exsultate, iusti, in Domino; rectos decet collaudatio. ²Confitemini Domino in cithara; in psalterio decem chordarum psallite illi. ⁴Quia rectum est verbum Domini, et omnia opera eius in fide. ⁵Diligit misericordiam et iudicium; misericordia Domini plena est terra. ¹¹Consilium autem Domini in aeternum manet; cogitationes cordis eius in generatione et generationem. ¹²Beata gens cuius est Dominus Deus eius; populus quem elegit in haereditatem sibi. ¹⁸Ecce oculi Domini super metuentes eum, et in eis qui sperant super misericordia eius: ¹⁹ut eruat a morte animas eorum, et alat eos in fame.

℟ Misericordia Domini plena est terra.

Ignem veni mittere in terram, et quid volo nisi ut accendatur? ⁵⁰Baptismo autem habeo baptizari: et quomodo coarctor usque dum perficiatur? ⁵¹Putatis quia pacem veni dare in terram? non, dico vobis, sed separationem: ⁵²erunt enim ex hoc quinque in domo una divisi, tres in duos, et duo in tres ⁵³dividentur: pater in filium, et filius in patrem suum, mater in filiam, et filia in matrem, socrus in nurum suam, et nurus in socrum suam.