Dominica trigesima per annum

Advenam non contristabis, neque affliges eum: advenae enim et ipsi fuistis in terra Aegypti. ²¹Viduae et pupillo non nocebitis. ²²Si laeseritis eos, vociferabuntur ad me, et ego audiam clamorem eorum: ²³et indignabitur furor meus, percutiamque vos gladio, et erunt uxores vestrae viduae, et filii vestri pupilli. ²⁴Si pecuniam mutuam dederis populo meo pauperi qui habitat tecum, non urgebis eum quasi exactor, nec usuris opprimes. ²⁵Si pignus a proximo tuo acceperis vestimentum, ante solis occasum reddes ei. ²⁶Ipsum enim est solum, quo operitur, indumentum carnis eius, nec habet aliud in quo dormiat: si clamaverit ad me, exaudiam eum, quia misericors sum.

²Diligam te, Domine, fortitudo mea. ³Dominus firmamentum meum, et refugium meum, et liberator meus. Deus meus adiutor meus, et sperabo in eum; protector meus, et cornu salutis meae, et susceptor meus. ⁴Laudans invocabo Dominum, et ab inimicis meis salvus ero. ⁴⁷Vivit Dominus, et benedictus Deus meus, et exaltetur Deus salutis meae. ⁵¹magnificans salutes regis eius, et faciens misericordiam christo suo David, et semini eius usque in saeculum.

℟ Diligam te, Domine, fortitudo mea.

quia Evangelium nostrum non fuit ad vos in sermone tantum, sed et in virtute, et in Spiritu Sancto, et in plenitudine multa, sicut scitis quales fuerimus in vobis propter vos. ⁶Et vos imitatores nostri facti estis, et Domini, excipientes verbum in tribulatione multa, cum gaudio Spiritus Sancti: ⁷ita ut facti sitis forma omnibus credentibus in Macedonia, et in Achaia. ⁸A vobis enim diffamatus est sermo Domini, non solum in Macedonia, et in Achaia, sed et in omni loco fides vestra, quae est ad Deum, profecta est ita ut non sit nobis necesse quidquam loqui. ⁹Ipsi enim de nobis annuntiant qualem introitum habuerimus ad vos: et quomodo conversi estis ad Deum a simulacris, servire Deo vivo, et vero, ¹⁰et exspectare Filium eius de caelis (quem suscitavit a mortuis) Iesum, qui eripuit nos ab ira ventura.

Pharisaei autem audientes quod silentium imposuisset sadducaeis, convenerunt in unum: ³⁵et interrogavit eum unus ex eis legis doctor, tentans eum: ³⁶Magister, quod est mandatum magnum in lege? ³⁷Ait illi Iesus: Diliges Dominum Deum tuum ex toto corde tuo, et in tota anima tua, et in tota mente tua. ³⁸Hoc est maximum, et primum mandatum. ³⁹Secundum autem simile est huic: Diliges proximum tuum, sicut teipsum. ⁴⁰In his duobus mandatis universa lex pendet, et prophetae.