Feria tertia, hebdomada trigesima per annum

subiecti invicem in timore Christi. ²²Mulieres viris suis subditae sint, sicut Domino: ²³quoniam vir caput est mulieris, sicut Christus caput est Ecclesiae: ipse, salvator corporis eius. ²⁴Sed sicut Ecclesia subiecta est Christo, ita et mulieres viris suis in omnibus. ²⁵Viri, diligite uxores vestras, sicut et Christus dilexit Ecclesiam, et seipsum tradidit pro ea, ²⁶ut illam sanctificaret, mundans lavacro aquae in verbo vitae, ²⁷ut exhiberet ipse sibi gloriosam Ecclesiam, non habentem maculam, aut rugam, aut aliquid huiusmodi, sed ut sit sancta et immaculata. ²⁸Ita et viri debent diligere uxores suas ut corpora sua. Qui suam uxorem diligit, seipsum diligit. ²⁹Nemo enim umquam carnem suam odio habuit: sed nutrit et fovet eam, sicut et Christus Ecclesiam: ³⁰quia membra sumus corporis eius, de carne eius et de ossibus eius. ³¹Propter hoc relinquet homo patrem et matrem suam, et adhaerebit uxori suae, et erunt duo in carne una. ³²Sacramentum hoc magnum est, ego autem dico in Christo et in Ecclesia. ³³Verumtamen et vos singuli, unusquisque uxorem suam sicut seipsum diligat: uxor autem timeat virum suum.

¹Canticum graduum. Beati omnes qui timent Dominum, qui ambulant in viis eius. ²Labores manuum tuarum quia manducabis: beatus es, et bene tibi erit. ³Uxor tua sicut vitis abundans in lateribus domus tuae; filii tui sicut novellae olivarum in circuitu mensae tuae. ⁴Ecce sic benedicetur homo qui timet Dominum. ⁵Benedicat tibi Dominus ex Sion, et videas bona Ierusalem omnibus diebus vitae tuae.

℟ Beati omnes qui timent Dominum.

Dicebat ergo: Cui simile est regnum Dei, et cui simile aestimabo illud? ¹⁹Simile est grano sinapis, quod acceptum homo misit in hortum suum, et crevit, et factum est in arborem magnam: et volucres caeli requieverunt in ramis eius. ²⁰Et iterum dixit: Cui simile aestimabo regnum Dei? ²¹Simile est fermento, quod acceptum mulier abscondit in farinae sata tria, donec fermentaretur totum.