Feria quarta, hebdomada tertia Adventus

ut sciant hi qui ab ortu solis et qui ab occidente, quoniam absque me non est: ego Dominus, et non est alter: ⁷formans lucem et creans tenebras, faciens pacem et creans malum: ego Dominus faciens omnia haec. ⁸Rorate, caeli, desuper, et nubes pluant iustum; aperiatur terra, et germinet Salvatorem, et iustitia oriatur simul: ego Dominus creavi eum. ¹⁸Quia haec dicit Dominus creans caelos, ipse Deus formans terram et faciens eam, ipse plastes eius; non in vanum creavit eam: ut habitaretur formavit eam: Ego Dominus, et non est alius. ²¹Annuntiate, et venite, et consiliamini simul. Quis auditum fecit hoc ab initio, ex tunc praedixit illud? numquid non ego Dominus, et non est ultra deus absque me? Deus iustus, et salvans non est praeter me. ²²Convertimini ad me, et salvi eritis, omnes fines terrae, quia ego Deus, et non est alius. ²³In memetipso iuravi; egredietur de ore meo iustitiae verbum, et non revertetur: quia mihi curvabitur omne genu, et iurabit omnis lingua. ²⁴Ergo in Domino, dicet, meae sunt iustitiae et imperium; ad eum venient, et confundentur omnes qui repugnant ei. ²⁵In Domino iustificabitur, et laudabitur omne semen Israël.

⁹Audiam quid loquatur in me Dominus Deus, quoniam loquetur pacem in plebem suam, et super sanctos suos, et in eos qui convertuntur ad cor. ¹⁰Verumtamen prope timentes eum salutare ipsius, ut inhabitet gloria in terra nostra. ¹¹Misericordia et veritas obviaverunt sibi; iustitia et pax osculatae sunt. ¹²Veritas de terra orta est, et iustitia de caelo prospexit. ¹³Etenim Dominus dabit benignitatem, et terra nostra dabit fructum suum. ¹⁴Iustitia ante eum ambulabit, et ponet in via gressus suos.

℟ Rorate, caeli, desuper, et nubes pluant iustum.

Et nuntiaverunt Ioanni discipuli eius de omnibus his. ¹⁹Et convocavit duos de discipulis suis Ioannes, et misit ad Iesum, dicens: Tu es qui venturus es, an alium exspectamus? ²⁰Cum autem venissent ad eum viri, dixerunt: Ioannes Baptista misit nos ad te dicens: Tu es qui venturus es, an alium exspectamus? ²¹(In ipsa autem hora multos curavit a languoribus, et plagis, et spiritibus malis, et caecis multis donavit visum.) ²²Et respondens, dixit illis: Euntes renuntiate Ioanni quae audistis et vidistis: quia caeci vident, claudi ambulant, leprosi mundantur, surdi audiunt, mortui resurgunt, pauperes evangelizantur: ²³et beatus est quicumque non fuerit scandalizatus in me.