Feria tertia, hebdomada tertia Adventus

Vae provocatrix, et redempta civitas, columba! ²non audivit vocem, et non suscepit disciplinam; in Domino non est confisa, ad Deum suum non appropinquavit. ⁹Quia tunc reddam populis labium electum, ut invocent omnes in nomine Domini, et serviant ei humero uno. ¹⁰Ultra flumina Aethiopiae, inde supplices mei; filii dispersorum meorum deferent munus mihi. ¹¹In die illa non confunderis super cunctis adinventionibus tuis, quibus praevaricata es in me, quia tunc auferam de medio tui magniloquos superbiae tuae, et non adiicies exaltari amplius in monte sancto meo. ¹²Et derelinquam in medio tui populum pauperem et egenum: et sperabunt in nomine Domini. ¹³Reliquiae Israël non facient iniquitatem, nec loquentur mendacium, et non invenietur in ore eorum lingua dolosa, quoniam ipsi pascentur, et accubabunt, et non erit qui exterreat.

²Benedicam Dominum in omni tempore; semper laus eius in ore meo. ³In Domino laudabitur anima mea: audiant mansueti, et laetentur. ⁶Accedite ad eum, et illuminamini; et facies vestrae non confundentur. ⁷Iste pauper clamavit, et Dominus exaudivit eum, et de omnibus tribulationibus eius salvavit eum. ¹⁷Vultus autem Domini super facientes mala, ut perdat de terra memoriam eorum. ¹⁸Clamaverunt iusti, et Dominus exaudivit eos; et ex omnibus tribulationibus eorum liberavit eos. ¹⁹Iuxta est Dominus iis qui tribulato sunt corde, et humiles spiritu salvabit. ²³Redimet Dominus animas servorum suorum, et non delinquent omnes qui sperant in eo.

℟ Iste pauper clamavit, et Dominus exaudivit eum.

Quid autem vobis videtur? Homo quidam habebat duos filios, et accedens ad primum, dixit: Fili, vade hodie, operare in vinea mea. ²⁹Ille autem respondens, ait: Nolo. Postea autem, poenitentia motus, abiit. ³⁰Accedens autem ad alterum, dixit similiter. At ille respondens, ait: Eo, domine, et non ivit: ³¹quis ex duobus fecit voluntatem patris? Dicunt ei: Primus. Dicit illis Iesus: Amen dico vobis, quia publicani et meretrices praecedent vos in regnum Dei. ³²Venit enim ad vos Ioannes in via iustitiae, et non credidistis ei: publicani autem et meretrices crediderunt ei: vos autem videntes nec poenitentiam habuistis postea, ut crederetis ei.