Dia 18 decembris

Ecce dies veniunt, dicit Dominus, et suscitabo David germen iustum: et regnabit rex, et sapiens erit, et faciet iudicium et iustitiam in terra. ⁶In diebus illis salvabitur Iuda, et Israël habitabit confidenter: et hoc est nomen quod vocabunt eum: Dominus iustus noster. ⁷Propter hoc ecce dies veniunt, dicit Dominus, et non dicent ultra: Vivit Dominus, qui eduxit filios Israël de terra Aegypti, ⁸sed: Vivit Dominus, qui eduxit et adduxit semen domus Israël de terra aquilonis, et de cunctis terris ad quas eieceram eos illuc, et habitabunt in terra sua.

¹Psalmus, in Salomonem. ²Deus, iudicium tuum regi da, et iustitiam tuam filio regis; iudicare populum tuum in iustitia, et pauperes tuos in iudicio. ¹²Quia liberabit pauperem a potente, et pauperem cui non erat adiutor. ¹³Parcet pauperi et inopi, et animas pauperum salvas faciet. ¹⁸Benedictus Dominus Deus Israël, qui facit mirabilia solus. ¹⁹Et benedictum nomen maiestatis eius in aeternum, et replebitur maiestate eius omnis terra. Fiat, fiat.

℟ Orietur in diebus eius iustitia, et abundantia pacis.

Christi autem generatio sic erat: cum esset desponsata mater eius Maria Ioseph, antequam convenirent inventa est in utero habens de Spiritu Sancto. ¹⁹Ioseph autem vir eius cum esset iustus, et nollet eam traducere, voluit occulte dimittere eam. ²⁰Haec autem eo cogitante, ecce angelus Domini apparuit in somnis ei, dicens: Ioseph, fili David, noli timere accipere Mariam coniugem tuam: quod enim in ea natum est, de Spiritu Sancto est. ²¹Pariet autem filium: et vocabis nomen eius Iesum: ipse enim salvum faciet populum suum a peccatis eorum. ²²Hoc autem totum factum est, ut adimpleretur quod dictum est a Domino per prophetam dicentem: ²³Ecce virgo in utero habebit, et pariet filium: et vocabunt nomen eius Emmanuel, quod est interpretatum Nobiscum Deus. ²⁴Exsurgens autem Ioseph a somno, fecit sicut praecepit ei angelus Domini, et accepit coniugem suam.