S. Ioannis a Cruce, presbyteri et Ecclesiae doctoris

et elevans oculos, vidit Israël in tentoriis commorantem per tribus suas: et irruente in se spiritu Dei, ³assumpta parabola, ait: Dixit Balaam filius Beor: dixit homo, cuius obturatus est oculus: ⁴dixit auditor sermonum Dei, qui visionem Omnipotentis intuitus est, qui cadit, et sic aperiuntur oculi eius: ⁵Quam pulchra tabernacula tua, Iacob, et tentoria tua, Israël! ⁶ut valles nemorosae, ut horti iuxta fluvios irrigui, ut tabernacula quae fixit Dominus, quasi cedri prope aquas. ⁷Fluet aqua de situla eius, et semen illius erit in aquas multas. Tolletur propter Agag, rex eius, et auferetur regnum illius. ¹⁵Sumpta igitur parabola, rursum ait: Dixit Balaam filius Beor: dixit homo, cuius obturatus est oculus: ¹⁶dixit auditor sermonum Dei, qui novit doctrinam Altissimi, et visiones Omnipotentis videt, qui cadens apertos habet oculos: ¹⁷Videbo eum, sed non modo: intuebor illum, sed non prope. Orietur stella ex Iacob, et consurget virga de Israël: et percutiet duces Moab, vastabitque omnes filios Seth.

⁴Confundantur omnes iniqua agentes supervacue. Vias tuas, Domine, demonstra mihi, et semitas tuas edoce me. ⁵Dirige me in veritate tua, et doce me, quia tu es Deus salvator meus, et te sustinui tota die. ⁶Reminiscere miserationum tuarum, Domine, et misericordiarum tuarum quae a saeculo sunt. ⁷Delicta iuventutis meae, et ignorantias meas, ne memineris. Secundum misericordiam tuam memento mei tu, propter bonitatem tuam, Domine. ⁸Dulcis et rectus Dominus; propter hoc legem dabit delinquentibus in via. ⁹Diriget mansuetos in iudicio; docebit mites vias suas.

℟ Vias tuas, Domine, demonstra mihi.

Et cum venisset in templum, accesserunt ad eum docentem principes sacerdotum, et seniores populi, dicentes: In qua potestate haec facis? et quis tibi dedit hanc potestatem? ²⁴Respondens Iesus dixit eis: Interrogabo vos et ego unum sermonem: quem si dixeritis mihi, et ego vobis dicam in qua potestate haec facio. ²⁵Baptismus Ioannis unde erat? e caelo, an ex hominibus? At illi cogitabant inter se, dicentes: ²⁶Si dixerimus, e caelo, dicet nobis: Quare ergo non credidistis illi? Si autem dixerimus, ex hominibus, timemus turbam: omnes enim habebant Ioannem sicut prophetam. ²⁷Et respondentes Iesu, dixerunt: Nescimus. Ait illis et ipse: Nec ego dico vobis in qua potestate haec facio.