Feria tertia, hebdomada vigesima octava per annum

State, et nolite iterum iugo servitutis contineri. ²Ecce ego Paulus dico vobis: quoniam si circumcidamini, Christus vobis nihil proderit. ³Testificor autem rursus omni homini circumcidenti se, quoniam debitor est universae legis faciendae. ⁴Evacuati estis a Christo, qui in lege iustificamini: a gratia excidistis. ⁵Nos enim spiritu ex fide, spem iustitiae exspectamus. ⁶Nam in Christo Iesu neque circumcisio aliquid valet, neque praeputium: sed fides, quae per caritatem operatur.

⁴¹Vau Et veniat super me misericordia tua, Domine; salutare tuum secundum eloquium tuum. ⁴³Et ne auferas de ore meo verbum veritatis usquequaque, quia in iudiciis tuis supersperavi. ⁴⁴Et custodiam legem tuam semper, in saeculum et in saeculum saeculi. ⁴⁵Et ambulabam in latitudine, quia mandata tua exquisivi. ⁴⁷Et meditabar in mandatis tuis, quae dilexi. ⁴⁸Et levavi manus meas ad mandata tua, quae dilexi, et exercebar in iustificationibus tuis.

℟ Veniat super me misericordia tua, Domine.

Et cum loqueretur, rogavit illum quidam pharisaeus ut pranderet apud se. Et ingressus recubuit. ³⁸Pharisaeus autem coepit intra se reputans dicere, quare non baptizatus esset ante prandium. ³⁹Et ait Dominus ad illum: Nunc vos pharisaei, quod deforis est calicis et catini, mundatis: quod autem intus est vestrum, plenum est rapina et iniquitate. ⁴⁰Stulti! nonne qui fecit quod deforis est, etiam id quod deintus est fecit? ⁴¹Verumtamen quod superest, date eleemosynam: et ecce omnia munda sunt vobis.