Feria secunda, hebdomada vigesima octava per annum

Scriptum est enim: Quoniam Abraham duos filios habuit: unum de ancilla, et unum de libera. ²³Sed qui de ancilla, secundum carnem natus est: qui autem de libera, per repromissionem: ²⁴quae sunt per allegoriam dicta. Haec enim sunt duo testamenta. Unum quidem in monte Sina, in servitutem generans, quae est Agar: ²⁶Illa autem, quae sursum est Ierusalem, libera est, quae est mater nostra. ²⁷Scriptum est enim: Laetare, sterilis, quae non paris; erumpe et clama, quae non parturis: quia multi filii desertae, magis quam eius quae habet virum. ³¹Itaque, fratres, non sumus ancillae filii, sed liberae: qua libertate Christus nos liberavit.

¹State, et nolite iterum iugo servitutis contineri.

¹Alleluia. Laudate, pueri, Dominum; laudate nomen Domini. ²Sit nomen Domini benedictum ex hoc nunc et usque in saeculum. ³A solis ortu usque ad occasum laudabile nomen Domini. ⁴Excelsus super omnes gentes Dominus, et super caelos gloria eius. ⁵Quis sicut Dominus Deus noster, qui in altis habitat, ⁶et humilia respicit in caelo et in terra? ⁷Suscitans a terra inopem, et de stercore erigens pauperem:

℟ Sit nomen Domini benedictum in saeculum.

Turbis autem concurrentibus coepit dicere: Generatio haec, generatio nequam est: signum quaerit, et signum non dabitur ei, nisi signum Ionae prophetae. ³⁰Nam sicut fuit Ionas signum Ninivitis, ita erit et Filius hominis generationi isti. ³¹Regina austri surget in iudicio cum viris generationis huius, et condemnabit illos: quia venit a finibus terrae audire sapientiam Salomonis: et ecce plus quam Salomon hic. ³²Viri Ninivitae surgent in iudicio cum generatione hac, et condemnabunt illam: quia poenitentiam egerunt ad praedicationem Ionae, et ecce plus quam Ionas hic.