Siracides 49

¹Memoria Iosiae in compositionem odoris facta opus pigmentarii.

²In omni ore quasi mel indulcabitur eius memoria, et ut musica in convivio vini.

³Ipse est directus divinitus in poenitentiam gentis, et tulit abominationes impietatis.

⁴Et gubernavit ad Dominum cor ipsius, et in diebus peccatorum corroboravit pietatem.

⁵Praeter David et Ezechiam et Iosiam, omnes peccatum commiserunt:

⁶nam reliquerunt legem Altissimi reges Iuda, et contempserunt timorem Dei.

⁷Dederunt enim regnum suum aliis, et gloriam suam alienigenae genti.

⁸Incenderunt electam sanctitatis civitatem, et desertas fecerunt vias ipsius in manu Ieremiae.

⁹Nam male tractaverunt illum qui a ventre matris consecratus est propheta, evertere, et eruere, et perdere, et iterum aedificare, et renovare:

¹⁰Ezechiel, qui vidit conspectum gloriae quam ostendit illi in curru cherubim.

¹¹Nam commemoratus est inimicorum in imbre, benefacere illis qui ostenderunt rectas vias.

¹²Et duodecim prophetarum ossa pullulent de loco suo: nam corroboraverunt Iacob, et redemerunt se in fide virtutis.

¹³Quomodo amplificemus Zorobabel? nam et ipse quasi signum in dextera manu:

¹⁴sic et Iesum filium Iosedec, qui in diebus suis aedificaverunt domum, et exaltaverunt templum sanctum Domino, paratum in gloriam sempiternam.

¹⁵Et Nehemias in memoriam multi temporis, qui erexit nobis muros eversos, et stare fecit portas et seras, qui erexit domos nostras.

¹⁶Nemo natus est in terra qualis Henoch, nam et ipse receptus est a terra: ¹⁷neque ut Ioseph, qui natus est homo princeps fratrum, firmamentum gentis, rector fratrum, stabilimentum populi: ¹⁸et ossa ipsius visitata sunt, et post mortem prophetaverunt. ¹⁹Seth et Sem apud homines gloriam adepti sunt, et super omnem animam in origine Adam.