Sapientia 3

¹Iustorum autem animae in manu Dei sunt, et non tangent illos tormentum mortis.

²Visi sunt oculis insipientium mori, et aestimata est afflictio exitus illorum,

³et quod a nobis est iter exterminium; illi autem sunt in pace:

⁴etsi coram hominibus tormenta passi sunt, spes illorum immortalitate plena est.

⁵In paucis vexati sunt, in multis bene disponentur, quoniam Deus tentavit eos, et invenit illos dignos se.

⁶Tamquam aurum in fornace probavit illos, et quasi holocausti hostiam accepit illos, et in tempore erit respectus illorum.

⁷Fulgebunt iusti et tamquam scintillae in arundineto discurrent.

⁸Iudicabunt nationes, et dominabuntur populis, et regnabit Dominus illorum in perpetuum.

⁹Qui confidunt in illo intelligent veritatem, et fideles in dilectione acquiescent illi, quoniam donum et pax est electis eius.

¹⁰Impii autem secundum quae cogitaverunt correptionem habebunt: qui neglexerunt iustum, et a Domino recesserunt.

¹¹Sapientiam enim et disciplinam qui abiicit infelix est: et vacua est spes illorum, et labores sine fructu, et inutilia opera eorum.

¹²Mulieres eorum insensatae sunt, et nequissimi filii eorum.

¹³Maledicta creatura eorum, quoniam felix est sterilis; et incoinquinata, quae nescivit thorum in delicto, habebit fructum in respectione animarum sanctarum;

¹⁴et spado qui non operatus est per manus suas iniquitatem, nec cogitavit adversus Deum nequissima: dabitur enim illi fidei donum electum, et sors in templo Dei acceptissima.

¹⁵Bonorum enim laborum gloriosus est fructus, et quae non concidat radix sapientiae.

¹⁶Filii autem adulterorum in inconsummatione erunt, et ab iniquo thoro semen exterminabitur.

¹⁷Et si quidem longae vitae erunt, in nihilum computabuntur, et sine honore erit novissima senectus illorum:

¹⁸et si celerius defuncti fuerint, non habebunt spem, nec in die agnitionis allocutionem.

¹⁹Nationis enim iniquae dirae sunt consummationes.