Osee 5

¹Audite hoc, sacerdotes, et attendite, domus Israël, et domus regis, auscultate: quia vobis iudicium est, quoniam laqueus facti estis speculationi, et rete expansum super Thabor.

²Et victimas declinastis in profundum; et ego eruditor omnium eorum.

³Ego scio Ephraim, et Israël non est absconditus a me: quia nunc fornicatus est Ephraim; contaminatus est Israël.

⁴Non dabunt cogitationes suas ut revertantur ad Deum suum, quia spiritus fornicationum in medio eorum, et Dominum non cognoverunt.

⁵Et respondebit arrogantia Israël in facie eius, et Israël et Ephraim ruent in iniquitate sua: ruet etiam Iudas cum eis.

⁶In gregibus suis et in armentis suis vadent ad quaerendum Dominum, et non invenient: ablatus est ab eis.

⁷In Dominum praevaricati sunt, quia filios alienos genuerunt: nunc devorabit eos mensis, cum partibus suis.

⁸Clangite buccina in Gabaa, tuba in Rama; ululate in Bethaven, post tergum tuum, Beniamin.

⁹Ephraim in desolatione erit in die correptionis; in tribubus Israël ostendi fidem.

¹⁰Facti sunt principes Iuda quasi assumentes terminum; super eos effundam quasi aquam iram meam.

¹¹Calumniam patiens est Ephraim, fractus iudicio, quoniam coepit abire post sordes.

¹²Et ego quasi tinea Ephraim, et quasi putredo domui Iuda.

¹³Et vidit Ephraim languorem suum, et Iuda vinculum suum; et abiit Ephraim ad Assur, et misit ad regem ultorem: et ipse non poterit sanare vos, nec solvere poterit a vobis vinculum.

¹⁴Quoniam ego quasi leaena Ephraim, et quasi catulus leonis domui Iuda. Ego, ego capiam, et vadam; tollam, et non est qui eruat.

¹⁵Vadens revertar ad locum meum, donec deficiatis, et quaeratis faciem meam.