Exodus 25

¹Locutusque est Dominus ad Moysen, dicens: ²Loquere filiis Israël, ut tollant mihi primitias: ab omni homine qui offeret ultroneus, accipietis eas. ³Haec sunt autem quae accipere debeatis: aurum, et argentum, et aes, ⁴hyacinthum et purpuram, coccumque bis tinctum, et byssum, pilos caprarum, ⁵et pelles arietum rubricatas, pellesque ianthinas, et ligna setim: ⁶oleum ad luminaria concinnanda: aromata in unguentum, et thymiamata boni odoris: ⁷lapides onychinos, et gemmas ad ornandum ephod, ac rationale. ⁸Facientque mihi sanctuarium, et habitabo in medio eorum: ⁹iuxta omnem similitudinem tabernaculi quod ostendam tibi, et omnium vasorum in cultum eius. Sicque facietis illud:

¹⁰arcam de lignis setim compingite, cuius longitudo habeat duos et semis cubitos: latitudo, cubitum et dimidium: altitudo, cubitum similiter ac semissem. ¹¹Et deaurabis eam auro mundissimo intus et foris: faciesque supra, coronam auream per circuitum: ¹²et quatuor circulos aureos, quos pones per quatuor arcae angulos: duo circuli sint in latere uno, et duo in altero. ¹³Facies quoque vectes de lignis setim, et operies eos auro. ¹⁴Inducesque per circulos qui sunt in arcae lateribus, ut portetur in eis: ¹⁵qui semper erunt in circulis, nec umquam extrahentur ab eis. ¹⁶Ponesque in arca testificationem quam dabo tibi.

¹⁷Facies et propitiatorium de auro mundissimo: duos cubitos et dimidium tenebit longitudo eius, et cubitum ac semissem latitudo. ¹⁸Duos quoque cherubim aureos et productiles facies, ex utraque parte oraculi. ¹⁹Cherub unus sit in latere uno, et alter in altero. ²⁰Utrumque latus propitiatorii tegant expandentes alas, et operientes oraculum, respiciantque se mutuo versis vultibus in propitiatorium quo operienda est arca, ²¹in qua pones testimonium quod dabo tibi. ²²Inde praecipiam, et loquar ad te supra propitiatorium, ac de medio duorum cherubim, qui erunt super arcam testimonii, cuncta quae mandabo per te filiis Israël.

²³Facies et mensam de lignis setim, habentem duos cubitos longitudinis, et in latitudine cubitum, et in altitudine cubitum et semissem. ²⁴Et inaurabis eam auro purissimo: faciesque illi labium aureum per circuitum, ²⁵et ipsi labio coronam interrasilem altam quatuor digitis: et super illam, alteram coronam aureolam. ²⁶Quatuor quoque circulos aureos praeparabis, et pones eis in quatuor angulis eiusdem mensae per singulos pedes. ²⁷Subter coronam erunt circuli aurei, ut mittantur vectes per eos, et possit mensa portari. ²⁸Ipsos quoque vectes facies de lignis setim, et circumdabis auro ad subvehendam mensam. ²⁹Parabis et acetabula, ac phialas, thuribula, et cyathos, in quibus offerenda sunt libamina, ex auro purissimo. ³⁰Et pones super mensam panes propositionis in conspectu meo semper.

³¹Facies et candelabrum ductile de auro mundissimo, hastile eius, et calamos, scyphos, et sphaerulas, ac lilia ex ipso procedentia. ³²Sex calami egredientur de lateribus, tres ex uno latere, et tres ex altero. ³³Tres scyphi quasi in nucis modum per calamos singulos, sphaerulaque simul, et lilium: et tres similiter scyphi instar nucis in calamo altero, sphaerulaque simul et lilium. Hoc erit opus sex calamorum, qui producendi sunt de hastili: ³⁴in ipso autem candelabro erunt quatuor scyphi in nucis modum, sphaerulaeque per singulos, et lilia. ³⁵Sphaerulae sub duobus calamis per tria loca, qui simul sex fiunt procedentes de hastili uno. ³⁶Et sphaerulae igitur et calami ex ipso erunt, universa ductilia de auro purissimo. ³⁷Facies et lucernas septem, et pones eas super candelabrum, ut luceant ex adverso. ³⁸Emunctoria quoque, et ubi quae emuncta sunt extinguantur, fiant de auro purissimo. ³⁹Omne pondus candelabri cum universis vasis suis habebit talentum auri purissimi. ⁴⁰Inspice, et fac secundum exemplar quod tibi in monte monstratum est.