Canticum Canticorum 8

¹Quis mihi det te fratrem meum, sugentem ubera matris meae, ut inveniam te foris, et deosculer te, et iam me nemo despiciat?

²Apprehendam te, et ducam in domum matris meae: ibi me docebis, et dabo tibi poculum ex vino condito, et mustum malorum granatorum meorum.

³Laeva eius sub capite meo, et dextera illius amplexabitur me.

⁴Sponsus Adiuro vos, filiae Ierusalem, ne suscitetis, neque evigilare faciatis dilectam, donec ipsa velit.

⁵Chorus Quae est ista quae ascendit de deserto, deliciis affluens, innixa super dilectum suum? Sponsus Sub arbore malo suscitavi te; ibi corrupta est mater tua, ibi violata est genitrix tua.

⁶Sponsa Pone me ut signaculum super cor tuum, ut signaculum super brachium tuum, quia fortis est ut mors dilectio, dura sicut infernus aemulatio: lampades eius lampades ignis atque flammarum.

⁷Aquae multae non potuerunt extinguere caritatem, nec flumina obruent illam. Si dederit homo omnem substantiam domus suae pro dilectione, quasi nihil despiciet eam.

⁸Chorus Fratrum Soror nostra parva, et ubera non habet; quid faciemus sorori nostrae in die quando alloquenda est?

⁹Si murus est, aedificemus super eum propugnacula argentea; si ostium est, compingamus illud tabulis cedrinis.

¹⁰Sponsa Ego murus, et ubera mea sicut turris, ex quo facta sum coram eo, quasi pacem reperiens.

¹¹Chorus Fratrum Vinea fuit pacifico in ea quae habet populos: tradidit eam custodibus; vir affert pro fructu eius mille argenteos.

¹²Sponsa Vinea mea coram me est. Mille tui pacifici, et ducenti his qui custodiunt fructus eius.

¹³Sponsus Quae habitas in hortis, amici auscultant; fac me audire vocem tuam.

¹⁴Sponsa Fuge, dilecte mi, et assimilare capreae, hinnuloque cervorum super montes aromatum.